
大寶伏藏TD1896སློབ་དཔོན་པདྨས་མཛད་པའི་བདུད་རྩིའི་ཚེ་བུམ་ཞེས་བྱ་བ་བཞུགས་སོ༔ ཞི་བའི་ལས་ཚོགས། ཚེ་བུམ།
46-15-1a
༄༅། །སློབ་དཔོན་པདྨས་མཛད་པའི་བདུད་རྩིའི་ཚེ་བུམ་ཞེས་བྱ་བ་བཞུགས་སོ༔ ཞི་བའི་ལས་ཚོགས། ཚེ་བུམ།
༄། །ཞུ་ལེན་གྱི་ལེའུ་སྟེ་དང་པོ།
༁ྃ༔ སློབ་དཔོན་པདྨས་མཛད་པའི་བདུད་རྩིའི་ཚེ་བུམ་ཞེས་བྱ་བ་བཞུགས་སོ༔ 
46-15-1b
རྒྱ་གར་ཨོ་རྒྱན་སྐད་དུ། ཨ་མྲྀ་ཏ་ཨཱ་ཡུཿསིདྡྷི་ཧྲཱིཿནཱ་མ༔ བོད་སྐད་དུ༔ བདུད་རྩིའི་ཚེ་བུམ་ཞེས་བྱ་བ༔ སློབ་དཔོན་པདྨ་འབྱུང་གནས་ཀྱིས༔ ཡེ་ཤེས་མཁའ་འགྲོ་མཚོ་རྒྱལ་མ་ལ་གསུངས་པ༔ གསོ་རིག་ཀུན་གྱི་སྙིང་ཐིག༔ བཻ་ཌཱུཪྻའི་ཐུགས་སྲོག༔ བདུད་རྩི་སྲོག་གི་ཆད་མཐུད༔ འཆི་མེད་ཚེའི་དངོས་གྲུབ༔ ཡང་གསང་རྡོ་རྗེའི་ཕ་ལམ༔ འདི་ལ་ཀ་ཁང་གཅིག་ཡོད༔ གུ་རུ་རིན་པོ་ཆེ་ལ༔ ཡེ་ཤེས་མཁའ་འགྲོ་མཚོ་རྒྱལ་གྱིས་ཞུས་པ༔ ཀྱེ་མ་ཀྱེ་ཧུད༔ སློབ་དཔོན་རིན་པོ་ཆེ་ལགས༔ ལྔ་བརྒྱ་དུས་ཀྱི་ཐ་མ་ལ༔ སློབ་དཔོན་པདྨའི་བཀའ་ཡང་གཅོག༔ སྟེང་གདོན་གཟའ་དང་འོག་གདོན་ཀླུ༔ ལྷ་སྲིན་སྡེ་བརྒྱད་མ་མོ་འཁྲུག༔ ནད་མཚོན་མུ་གེ་དམག་འཁྲུག་འབྱུང་༔ བཞི་བརྒྱ་རྩ་བཞི་རླུང་ལྟར་འཚུབས༔ གློ་བུར་མི་ནད་ཕྱུགས་ནད་མང་༔ མི་རྣམས་མི་རྟག་ཧུར་ཐུམས་འཆི༔ གག་ལྷོག་གཟེར་གསུམ་བདུན་དྲུག་འབྱུང་༔ སྐྱེ་འགྲོ་སེམས་ཅན་སྙིང་རེ་རྗེ༔ དེ་དུས་གུ་རུས་ཐུགས་རྗེས་གཟིགས༔ ཞེས་ཞུས་པས༔ སློབ་དཔོན་པདྨས་བཀའ་བསྩལ་པ༔ ཨེ་མ་ཧོ༔ ཡེ་ཤེས་མཁའ་འགྲོ་མཚོ་རྒྱལ་མ༔ མ་ཡེངས་བདག་གི་བཀའ་ལ་ཉོན༔ ལྔ་བརྒྱ་དུས་ཀྱི་སྙིགས་མ་ལ༔ ཚེ་ལོ་བཞི་བཅུ་ཁ་རལ་དུས༔ 
46-15-2a
ཧོར་སོགས་མཐའ་དམག་དར་བའི་ཚེ༔ བོད་ཀྱི་བསོད་ནམས་ཟད་པའི་དུས༔ སངས་རྒྱས་བསྟན་པ་ནང་འཁྲུག་བྱེད༔ གྲུབ་མཐའ་རྩོད་པས་དགེ་འདུན་འཁྲུག༔ སྐུ་གསུང་ཐུགས་ཀྱི་རྟེན་རྣམས་འཇིག༔ དེ་དུས་མི་དགེ་སྣ་ཚོགས་འབྱུང་༔ གག་ལྷོག་གཟེར་དང་བདུན་དྲུག་གིས༔ ན་ལོང་མེད་པར་ཧུར་ཐུམས་གུམ༔ དེ་འདྲའི་རྐྱེན་ངན་བཟློག་པའི་ཕྱིར༔ སློབ་དཔོན་པདྨའི་ཐུགས་ཀྱི་སྲས༔ བདེ་ཆེན་གླིང་པའི་མིང་ཅན་གྱིས༔ པད་འབྱུང་ང་ཡིས་སྦས་པའི་ཆོས་གཏེར་ཐོན༔ གབ་པའི་ཚུལ་གྱིས་སྨན་ཆོས་གཏེར་ལ་སྤྱོད༔ གསང་བའི་ངང་ནས་འགྲོ་དྲུག་བདེ་ལ་དགོད༔ སྐལ་ལྡན་མང་པོ་ཆོས་ལ་འཇུག༔ རིག་དྲུག་སེམས་ཅན་སྡུག་བསྔལ་སེལ༔ མཐོངས་སྐར་ཉི་ཁུད་བཞིན་དུ་ཐུགས་རྗེས་སྐྱོབས༔ ཞེས་གསུངས་སོ༔ ཞུ་ལེན་གྱི་ལེའུ་སྟེ་དང་པོ་འོ༔
༄། །འཆི་མེད་སངས་རྒྱས་སྨན་བླ་སྒྲུབ་པའི་ལེའུ་སྟེ་གཉིས་པ།
༁ྃ༔ ཨེ་མ་ཧོ༔ ཡེ་ཤེས་མཁའ་འགྲོ་མཚོ་རྒྱལ་མ༔ མ་ཡེངས་སྐད་ཅིག་ང་ལ་ཉོན༔ མ་རྗེད་སྙིང་གི་དཀྱིལ་དུ་ཆོངས༔ སངས་རྒྱས་སྨན་བླ་སྒྲུབ་པ་བཤད༔ སྐྱབས་སེམས་བསྐྱེད་རྫོགས་ཟུང་འཇུག་བསྒོམ༔ སྐྱབས་འགྲོ་ནི༔ ཧྲཱི༔ བདེ་གཤེགས་ཀུན་འདུས་བླ་མ་དང་༔ དཀོན་མཆོག་གསུམ་དང་སྨན་བླ་ལ༔ བྱང་ཆུབ་བར་དུ་སྐྱབས་སུ་མཆི༔ འགྲོ་བ་སེམས་
46-15-2b
ཅན་ཐམས་ཅད་ཀུན༔ ལུས་སེམས་སྡུག་བསྔལ་ཀུན་བསལ་ནས༔ སྨན་བླའི་གོ་འཕང་ཐོབ་བྱའི་ཕྱིར༔ བདག་གིས་བཅོམ་ལྡན་སྨན་བླ་བསྒྲུབ༔ ཧྲཱི༔ རང་སེམས་ཆོས་དབྱིངས་ཁྱབ་བརྡལ་ལྟ་ན་སྡུག༔ རང་རིག་འཆི་མེད་སངས་རྒྱས་སྨན་གྱི་བླ༔ སྐུ་མདོག་མཐིང་ག་བཻ་ཌཱུཪྻ་ཡི་འོད༔ ཞལ་གཅིག་ཕྱག་གཉིས་སྤྱན་གསུམ་ཐོར་ཚུགས་ཅན༔ དབུ་ལ་རིན་པོ་ཆེ་ཡི་པྲོག་ཞུས་བརྒྱན༔ ཕྱག་གཡས་གསེར་གྱི་རྡོ་རྗེ་ཨ་རུ་ར༔ གཡོན་པས་བདུད་རྩི་ཚེ་བུམ་ལྷུང་བཟེད་བསྣམས༔ ཞབས་གཉིས་རྡོ་རྗེ་སྐྱིལ་མོ་ཀྲུང་དུ་བཞུགས༔ སྐུ་ལ་རིན་པོ་ཆེ་དང་དར་དཔྱང་གསོལ༔ ལོངས་སྤྱོད་རྫོགས་པའི་སྐུ་རུ་གསལ་བར་བཞུགས༔ ཐུགས་ཀར་ས་བོན་ཧྲཱིཿཡིག་མཐིང་ག་ལས༔ སྔགས་ཀྱི་ཕྲེང་བ་གཡས་སུ་འཁོར་བར་བསམ༔ ཨོཾ་གུ་རུ་བཻ་ཌཱུཪྻ་ས་མུད་ག་ཏེ་སྭཱ་ཧཱ༔ ་བླ་མ་མཐིང་ག་ཡང་དག་པའི་གཞི་ཚུགས་ཤིག །རང་ལས་སྤྲུལ་པའི་མཆོད་པའི་ལྷ་མོ་ནི༔ ནམ་མཁའ་ས་གཞི་གང་བས་སྨན་བླ་མཆོད༔ ཉེར་སྤྱོད་བདུན་དང་འདོད་པའི་ཡོན་ཏན་ལྔ༔ རྒྱལ་སྲིད་སྣ་བདུན་བཀྲ་ཤིས་རྫས་རྟགས་བརྒྱད༔ རི་རབ་གླིང་བཞི་ལྷ་མིའི་ཡོ་བྱད་ཀུན༔ བློ་ཡིས་བླངས་ཏེ་སངས་རྒྱས་སྨན་བླ་མཆོད༔ སྨན་གྱི་རིགས་རྣམས་གང་དག་ཅི་ཡོད་དང་༔ རིན་ཆེན་རི་བོ་ལྗོན་ཤིང་ནགས་ཚལ་དང་༔ མེ་ཏོག་འབྲས་བཟང་མ་རྨོས་ལོ་
46-15-3a
ཐོག་དང་༔ ས་ཕྱོགས་དབེན་ཞིང་ཉམས་དགའ་གཞལ་མེད་ཁང་༔ དེ་རྣམས་བློ་ཡིས་སྤྲུལ་ཏེ་རབ་བཀང་ནས༔ བཅོམ་ལྡན་སྨན་བླ་རྒྱལ་བ་སྲས་བཅས་མཆོད༔ བསྟོད་པ་ནི༔ ཧྲཱི༔ བཅོམ་ལྡན་སྨན་བླ་སྐུ་མདོག་མཐིང་༔ བཻ་ཌཱུཪྻ་ཡི་འོད་ཟེར་ཅན༔ སངས་རྒྱས་ཐམས་ཅད་འདུས་པའི་ཐུགས༔ འགྲོ་བའི་སྡུག་བསྔལ་སེལ་མཛད་པ༔ བཅོམ་ལྡན་སྨན་གྱི་བླ་ལ་བསྟོད༔ ཐུགས་རྗེ་ཀུན་ལ་སྙོམས་པའི་བཅོམ་ལྡན་འདས༔ སོགས་ཚང་བར་བརྗོད་ནས་བསྟོད༔ འགྲོ་བའི་ནད་དང་རྒྱུ་རྐྱེན་གཉེན་པོ་རྣམས༔ མ་ནོར་གསལ་བར་བདག་ལ་བསྟན་དུ་གསོལ༔ དངོས་སུ་གསུངས་པའི་སྐལ་པ་མེད་ན་ཡང་༔ ནད་རྣམས་གང་ཡིན་གཉེན་པོ་གང་ཕན་པར༔ བདག་གི་ཡིད་ལ་འཆར་བར་མཛད་དུ་གསོལ༔ བཅོམ་ལྡན་སྨན་བླ་སྒྲུབ་པའི་ཐུགས་རྗེའི་མཐུས༔ ངན་སོང་སྒོ་གཅོད་མཐོ་རིས་ལམ་ཐོབ་ནས༔ རིམ་གྱིས་བླ་མེད་བྱང་ཆུབ་མྱུར་ཐོབ་ཤོག༔ མ་འོངས་ནམ་མཁའི་མཐར་ཐུག་འཇིག་རྟེན་ན༔ ནད་ཀྱི་བསྐལ་པ་གང་དུ་དར་བ་དེར༔ བདག་གིས་སྨན་པའི་གཟུགས་སུ་མངོན་སྤྲུལ་ནས༔ འགྲོ་བའི་ནད་རྣམས་མ་ལུས་སེལ་བར་ཤོག༔ བཅོམ་ལྡན་སྨན་གྱི་བླ་ཡི་སྐུ་གསུང་ཐུགས༔ བདག་གི་ལུས་ངག་ཡིད་གསུམ་དབྱེར་མེད་པ༔ སྐད་ཅིག་ཉིད་དུ་གྲུབ་པར་གྱུར་ནས་ཀྱང་༔ རྫོགས་པའི་
46-15-3b
བྱང་ཆུབ་དམ་པ་མྱུར་ཐོབ་ཤོག༔ མ་ཡེང་ངང་དུ་འདི་ཉིད་བཟླ༔ དེ་རྗེས་རང་སེམས་གཅེར་གྱིས་བལྟ༔ སྣང་སྟོང་ངང་དུ་སྟོང་པར་བཞག༔ ཕྱི་སྣོད་ལྟ་ན་སྡུག་ཏུ་དམིགས༔ ནང་བཅུད་བཻ་ཌཱུཪྻ་རུ་གསལ༔ འབུམ་ཚོ་བཅུ་གཉིས་གྲངས་དང་སྦྱར༔ ཉམས་དང་རྨི་ལམ་དངོས་སུ་མཇལ༔ སྨན་བླ་འགྲུབ་པར་ཐེ་ཚོམ་མེད༔ འཆི་མེད་སངས་རྒྱས་སྨན་བླ་སྒྲུབ་པའི་ལེའུ་སྟེ་གཉིས་པའོ༔
༄། །བླ་མ་རིག་འཛིན་སྒྲུབ་ཐབས་ཀྱི་ལེའུ་སྟེ་གསུམ་པ།
༁ྃ༔ སློབ་དཔོན་པདྨ་འབྱུང་གནས་ལ་ན་མོ༔ དེ་ནས་བླ་མ་བསྒྲུབ་པ་ནི༔ ན་མོ༔ སངས་རྒྱས་མ་ལུས་འདུས་པའི་སྐུ༔ བླ་མ་མཆོག་ལ་སྐྱབས་སུ་མཆི༔ འགྲོ་རྣམས་མ་ལུས་སྒྲོལ་བའི་ཕྱིར༔ བླ་མ་བསྒྲུབ་པར་སེམས་བསྐྱེད་དོ༔ བླ་མ་རིག་འཛིན་སྒྲུབ་ཐབས་བསྟན༔ སྐྱབས་འགྲོ་སེམས་བསྐྱེད་སྔོན་སོང་ནས༔ རང་རིག་ཆོས་སྐུ་དག་པའི་གསལ་ཆ་ལས༔ ཨོ་རྒྱན་ཧེ་རུ་ཀ་ཡི་སྒྲུབ་ཁང་གསལ༔ རང་ཉིད་སྐད་ཅིག་དྲན་རྫོགས་སུ༔ རིག་འཛིན་པདྨ་སམ་བྷ་ཝ༔ སྐུ་མདོག་དཀར་དམར་མདངས་དང་ལྡན༔ ཞལ་གཅིག་ཕྱག་གཉིས་རྡོར་དྲིལ་འཛིན༔ དབུ་ལ་པད་ཞུ་རྡོ་རྗེས་མཚན༔ རྡོ་རྗེའི་སྐྱིལ་མོ་ཀྲུང་དུ་བཞུགས༔ ཟ་འོག་བེར་སྔོན་ཆོས་གོས་གསོལ༔ མཚན་དང་དཔེ་བྱད་གཟི་བརྗིད་ལྡན༔ འཆི་མེད་རྡོ་རྗེ་ལྟ་བུའི་སྐུ༔ བླ་མ་ཡི་དམ་མཁའ་འགྲོས་བསྐོར༔ 
46-15-4a
ཐུགས་ཀར་ཉི་ཟླའི་དཀྱིལ་འཁོར་དབུས༔ ཧྲཱིཿཡིག་ས་བོན་ཛཔ྄་ཀྱིས་བསྐོར༔ ཨོཾ་གུ་རུ་པདྨ་སམ་བྷ་ཝ་སིདྡྷི་ཧྲཱི༔ མཆོད་བསྟོད་གང་ཤེས་བྱ༔ འབུམ་གསུམ་བཟླས་པས་བླ་མ་འགྲུབ༔ ལུས་ངག་ཡིད་གསུམ་མ་ཡེངས་པར༔ ཉམས་སུ་བླངས་པས་འཇའ་ལུས་མཁའ་སྤྱོད་འགྲུབ༔ བླ་མ་རིག་འཛིན་སྒྲུབ་ཐབས་ཀྱི་ལེའུ་སྟེ་གསུམ་པའོ༔
༄། །རྡོ་རྗེ་སེམས་དཔའ་བདུད་རྩིའི་སྦྱོར་བའི་ལེའུ་སྟེ་བཞི་པ།
༁ྃ༔ ཨོཾ་བཛྲ་སཏྭ་ཧཱུྃ༔ ་རྡོ་རྗེ་སེམས་དཔའ་ལ་ན་མོ། དལ་འབྱོར་མི་ཡི་ལུས་པོ་ལ༔ དུག་ལྔའི་ནད་ཀྱིས་ཟིན་པའི་ཚེ༔ དེ་ཉིད་སེལ་བའི་སྨན་སྦྱོར་ནི༔ འཆི་མེད་བདུད་རྩིའི་དངོས་གྲུབ་བསྟན༔ དང་པོ་རླུང་ནད་བཅོས་པ་ནི༔ རྒྱལ་པོས་བཏབ་པའི་རླུང་གི་ནད༔ ་དཀོར་བདག་པེ་དཀར་ལ་སོགས་པའི་གནོད་པས། སྙིང་ལ་གནས་བབས་ངེས་མེད་གཟེར༔ ཆུ་མདོག་སྔོ་ལ་ལྦུ་བ་ཆེ༔ རྩ་ནི་ཞར་ལ་སྟོང་ཞིང་གུད༔ དེ་ཉིད་སེལ་བའི་སྨན་སྦྱོར་ལ༔ ཛཱ་ཏི་བདུད་རྩིའི་སྦྱོར་བ་བསྟན༔ ཛཱ་ཏི་ལི་ཤི་ཨ་ཀ་རུ༔ གུ་གུལ་སྒྲོན་ཤིང་གོ་སྙོད་དང་༔ སྤོས་དཀར་རུ་རྟ་ཨ་རུ་ར༔ ཅུ་གང་མ་ནུ་སྙིང་ཞོ་ཤ༔ བུ་རམ་སྦྱར་བས་རླུང་ནད་དང་༔ སྐྱ་རྦབ་སྟོད་སྨད་ནད་ཀུན་འཇོམས༔ ཁྱད་པར་སྙིང་ལ་ཞུགས་པ་སེལ༔ ཛཱ་ཏི་བདུད་རྩིའི་སྦྱོར་བའོ༔ རྡོ་རྗེ་སེམས་དཔའ་བདུད་རྩིའི་སྦྱོར་བའི་ལེའུ་སྟེ་བཞི་པའོ༔ ༁ྃ༔
46-15-4b
༄། །རིན་ཆེན་འབྱུང་ལྡན་བདུད་རྩིའི་ལེའུ་སྟེ་ལྔ་པ།
ཨོཾ་རཏྣ་མུ་ཏྲ་ཏྲཱཾ༔ ་རིན་ཆེན་འབྱུང་ལྡན་ལ་ན་མོ། མ་མོའི་གནོད་པས་མཁྲིས་ནད་ན༔ ཆུ་མདོག་དམར་སེར་ཀུ་ཡ་མཐུག༔ རྩ་ནི་ཕྲ་གྲིམ་མགྱོགས་པར་འཕར༔ རཏྣ་བདུད་རྩིའི་སྦྱོར་བ་བསྟན༔ གསེར་མེ་གཡའ་ཀྱི་ཏིྒྟ་གསུམ༔ ཨ་རུ་ཧོང་ལེན་པར་པ་ཏ༔ ཟངས་རྩི་དུག་ཉུང་རེ་ཀོན་གསུམ༔ རྩ་མཁྲིས་སྐྱེར་ཤུན་ཀ་ར་སྦྱར༔ མཁྲིས་ནད་ཚད་པ་ཐམས་ཅད་སེལ༔ རཏྣ་བདུད་རྩིའི་སྦྱོར་བའོ༔ རིན་ཆེན་འབྱུང་ལྡན་བདུད་རྩིའི་ལེའུ་སྟེ་ལྔ་པའོ༔
༄། །སྣང་བ་མཐའ་ཡས་ཀྱི་བདུད་རྩིའི་ལེའུ་སྟེ་དྲུག་པ།
༁ྃ༔ ཨོཾ་ཨ་མི་ཏ་བྷ་ཧྲཱི༔ ་འོད་དཔག་མེད་ལ་ན་མོ། ས་བདག་གནོད་པས་བད་ཀན་ན༔ ཆུ་མདོག་དཀར་སྔོན་ཉོག་པ་འོ༔ རྩ་ནི་བྱིང་ཞིང་གུད་པའོ༔ པདྨ་བདུད་རྩིའི་སྦྱོར་བ་བསྟན༔ སེ་འབྲུ་ད་ལི་ན་ལེ་ཤམ༔ སུག་སྨེལ་ཤིང་ཚ་པི་པི་ལིང་༔ ཅོང་ཞི་མ་ནུ་སྟར་བུ་དང་༔ བསེ་ཡབ་འུ་སུ་པྲི་ཡང་ཀུ༔ བྲག་ཞུན་བུ་རམ་སྦྱར་བ་ཡིས༔ བད་ཀན་སྐྱ་སྨུག་འཐབས་པ་དང་༔ གྲང་ཅན་ནད་རིགས་ཐམས་ཅད་སེལ༔ པདྨ་བདུད་རྩིའི་སྦྱོར་བའོ༔ སྣང་བ་མཐའ་ཡས་ཀྱི་བདུད་རྩིའི་ལེའུ་སྟེ་དྲུག་པའོ༔
༄། །དོན་ཡོད་གྲུབ་པའི་བདུད་རྩིའི་ལེའུ་སྟེ་བདུན་པ།
༁ྃ༔ ཨོཾ་ཨ་མོ་གྷ་སིདྡྷི་ཨཱ༔ ་དོན་ཡོད་གྲུབ་པ་ལ་ན་མོ། རླུང་དང་མཁྲིས་པ་བད་ཀན་གསུམ༔ ཉེས་གསུམ་འདུས་པས་བད་སྨུག་ན༔ ཆུ་ནི་དམར་སེར་
46-15-5a
ཡང་ན་ལྗང་༔ རྩ་ནི་སྦོམ་ཁེང་ཀན་རྩ་ཞར༔ ཀརྨ་བདུད་རྩིའི་སྦྱོར་བ་བསྟན༔ རྣམ་རྒྱལ་བྲག་བཅུད་ཟླ་བ་གསུམ༔ བ་ཤ་ཀ་དང་རེ་ཀོན་པ༔ མ་ནུ་འུ་སུ་སྟར་བུ་དང་༔ སྟོད་སྨད་བར་ན་ཀ་ར་བུ་རམ་སྦྲང་རྩི་སྒྱུར༔ སྨུག་པོའི་ནད་རིགས་ཀུན་ལ་སྔགས༔ ཀརྨ་བདུད་རྩིའི་སྦྱོར་བའོ༔ དོན་ཡོད་གྲུབ་པའི་བདུད་རྩིའི་ལེའུ་སྟེ་བདུན་པའོ༔
༄། །རྣམ་པར་སྣང་མཛད་ཀྱི་བདུད་རྩིའི་ལེའུ་སྟེ་བརྒྱད་པ།
༁ྃ༔ ཨོཾ་བཻ་རོ་ཙ་ན་ཨོཾ༔ ་རྣམ་པར་སྣང་མཛད་ལ་ན་མོ། ཤིག་ཤེད་གནོད་པས་གླང་འཐབ་ནི༔ ཆུ་མདོག་དམར་ནག་ཁོང་ནས་བཟློག༔ རྩ་ནི་ཞར་འཁྱིག་ལྕམ་དྲལ་བྱེད༔ བུདྡྷ་བདུད་རྩིའི་སྦྱོར་བ་བསྟན༔ བསེ་རུ་སྨན་ཆེན་དཔའ་བོ་སེར༔ ཡུང་བ་གཅིག་ཐུབ་འཕུར་ལྡེབ་དང་༔ རུ་རྟ་ཤུ་དག་མ་གི་ཏ༔ གི་ཝང་གུར་གུམ་བྱི་ཏང་ཀ༔ ཀ་ར་སྦྱར་བས་གླང་ཐབས་དང་༔ ཕོ་ལྷོག་ལོང་སྲིན་གྲོལ་མ་འཇོམས༔ བུདྡྷ་བདུད་རྩིའི་སྦྱོར་བའོ༔ རྣམ་པར་སྣང་མཛད་ཀྱི་བདུད་རྩིའི་ལེའུ་སྟེ་བརྒྱད་པའོ༔
༄། །འཇིག་རྟེན་དབང་ཕྱུག་བདུད་རྩིའི་ལེའུ་སྟེ་དགུ་པ།
༁ྃ༔ ལོ་ཀེ་ཤྭ་ར་ལ་ན་མོ༔ ཀླུ་གཉན་གནོད་པས་དམུ་རྫིང་ན༔ གནོད་སྦྱིན་ལྟ་བུ་སྐྲངས་པ་བཅའ༔ ཡི་དྭགས་ལྟ་བུ་སྐམ་ཡང་སྲིད༔ ཁ་སྐམ་ཆུ་སྲི་སྐྲངས་པ་བཅའ༔ དབུགས་ཧལ་ནང་སྐྲངས་ལུས་པོ་ལྗིད༔ ཆུ་ནི་དམར་སེར་ལྗང་གུ་འབྱུང་༔ རྩ་ནི་སྦོམ་ལ་དལ་བའོ༔ ཐུགས་
46-15-5b
རྗེ་ཆེན་པོའི་སྨན་སྦྱོར་བསྟན༔ གི་ཧང་གུར་གུམ་ཅུ་གང་གསུམ༔ གསེར་མདོག་ཨུཏྤ་དཪྻ་ཀན༔ གསེར་མེ་བོང་དཀར་སྐྱུ་རུ་ར༔ པྲི་ཡང་འུ་སུ་བ་ཤ་ཀ༔ རྒྱ་ཚྭ་ལྕམ་པ་སྡིག་སྲིན་དང་༔ གསེར་ཕྱེ་གཟེ་མ་ཀ་ར་སྦྱར༔ དམུ་འོར་སྐྱ་རྦབ་སྐྲངས་པ་འཇོམས༔ ཚ་ཆུ་སེལ་བའི་བདུད་རྩི་ཡིན༔ ཐུགས་རྗེ་ཆེན་པོའི་སྨན་སྦྱོར་རོ༔ འཇིག་རྟེན་དབང་ཕྱུག་བདུད་རྩིའི་ལེའུ་སྟེ་དགུ་པའོ༔
༄། །འཇམ་དཔལ་གསེར་མདོག་ཅན་གྱི་བདུད་རྩིའི་ལེའུ་སྟེ་བཅུ་པ།
༁ྃ༔ ཨཱཪྻ་མཉྫུ་ཤྲཱི་ཡེ་ན་མོ༔ ་འཕགས་པ་འཇམ་དཔལ་ལ་ན་མོ། ས་བདག་གནོད་པས་སྐྲན་གྲིབ་འབྱུང་༔ དེ་ལ་ཚ་གྲང་གཉིས་སུ་འདུས༔ ཆུ་ནི་དམར་སེར་སྣ་ཚོགས་སྟོན༔ རྩ་ནི་ཕྲ་སྦོམ་ཞར་བའོ༔ འཇམ་དཔལ་བདུད་རྩིའི་སྦྱོར་བ་བསྟན༔ དང་པོ་སྨན་ནི་ཁྱུང་ལྔ་ལ༔ དེ་སྟེང་དོན་སྣོད་གཉེན་པོ་བསྡེབ༔ ཚ་སྐྲན་མ་ལུས་སེལ་བར་བྱེད༔ གང་ཉེའི་རྩ་ལ་གཏར་ཁ་གདབ༔ ཅོང་ཞི་རྡོ་ཐལ་བྱ་ཐལ་གསུམ༔ རྟ་རྨིག་འགྲོན་ཐལ་ལྕེ་ཚ་འམ༔ ལྕིམ་རྩ་གང་ཡིན་བཏགས་ལྕམ་ཚབ༔ དངུལ་ཆུ་གསེར་ཞུན་ཕྱེ་མ་སྦྱར༔ གྲང་སྐྲན་ནད་རིགས་མ་ལུས་འཇོམས༔ འབྲས་བུ་གསུམ་དང་ཆུ་སེར་སྨན་གསུམ་དང་༔ དམར་པོ་གསུམ་དང་སེང་ལྡེང་ཐང་༔ རྟག་པར་རྒྱུན་དུ་གཏང་བར་བྱ༔ དེ་ཡིས་སྨིན་སྡུད་དྭངས་སྙིགས་སྦྱང་༔ འཇམ་དཔལ་བདུད་རྩིའི་སྦྱོར་བའོ༔ འཇམ་དཔལ་གསེར་
46-15-6a
མདོག་ཅན་གྱི་བདུད་རྩིའི་ལེའུ་སྟེ་བཅུ་པའོ༔
༄། །ཕྱག་ན་རྡོ་རྗེའི་ལེའུ་སྟེ་བཅུ་གཅིག་པ།
༁ྃ༔ བཛྲ་པཱ་ཎི་ལ་ན་མོ༔ ་ཕྱག་རྡོར་ལ་ན་མོ། མ་མོ་ལྷ་སྲིན་འཁྲུགས་པ་ཡིས༔ གཉན་རིམས་བདུན་དྲུག་གཟེར་ཐུང་ན༔ ཆུ་མདོག་དམར་སེར་སྔོ་རྒོད་སྟོན༔ རྩ་ནི་མཁྲང་གྲིམ་ཡང་ན་ཞར༔ ལག་ན་བཛྲ་བདུད་རྩི་བསྟན༔ བོང་ང་འཛིན་པ་ཨ་རུ་ར༔ ཤུ་དག་གུ་གུལ་མ་གི་ཏ༔ ཙནྡན་གི་ཧང་སྟོང་རི་ཟིལ༔ ཡུང་བ་ཧོང་ལེན་བོང་ང་དཀར༔ ཏིྒྟ་བྲག་ཞུན་བ་ཤ་ཀ༔ རྒྱ་ཚྭ་སྦྱར་བས་གཉན་ནད་སེལ༔ བདུན་དྲུག་གཟེར་ཐུང་འཇོམས་པའི་མཆོག༔ ལག་ན་བཛྲ་བདུད་རྩི་འོ༔ ཕྱག་ན་རྡོ་རྗེའི་ལེའུ་སྟེ་བཅུ་གཅིག་པ་འོ༔
༄། །གོས་སྔོན་ཅན་གྱི་ཕྱག་མཚན་གྱི་ལེའུ་སྟེ་བཅུ་གཉིས་པ།
༁ྃ༔ ཨེ་མ་ཧོ༔ སྨན་གྱི་བླ་ལ་ཕྱག་འཚལ་ལོ༔ སློབ་དཔོན་པདྨས་བཀའ་བསྩལ་པ༔ ཡེ་ཤེས་མཁའ་འགྲོ་མཚོ་རྒྱལ་མ༔ སྐྱེ་འགྲོ་སེམས་ཅན་སྙིང་རེ་རྗེ༔ ལྔ་བརྒྱ་དུས་ཀྱི་ཐ་མ་ལ༔ དྲང་སྲོང་ཟུག་གཟེར་ཧུར་ཐུམས་འབྱུང་༔ སྙིང་གཟེར་བརྒྱལ་ནད་སྨྱོ་འབོག་ན༔ ན་ལོང་མེད་པར་སྲོག་ལ་རྒོལ༔ རྩ་དང་ཆུ་ལ་ངེས་པ་མེད༔ གནམ་ལྕགས་རྡོ་རྗེ་མེ་འབར་སྦྱོར༔ གུ་གུལ་སྤོས་དཀར་ཨ་ཀ་རུ༔ ཛཱ་ཏི་ལི་ཤི་སྙིང་ཞོ་ཤ༔ ཅུ་གང་མ་ནུ་རུ་རྟ་དང་༔ འབྲས་བུ་གསུམ་དང་ཀ་ར་སྦྱར༔ གཟའ་ནད་སྙིང་གཟེར་སྨྱོ་འབོག་དང་༔ རྒྱ་ནད་
46-15-6b
ཧུར་ཐུམས་སེལ་བར་བྱེད༔ གནམ་ལྕགས་རྡོ་རྗེའི་ཐོག་དང་མཚུངས༔ གོས་སྔོན་ཅན་གྱི་ཕྱག་མཚན་གྱི་ལེའུ་སྟེ་བཅུ་གཉིས་པའོ༔
༄། །ཕྲིན་ལས་ཁྱུང་དཀར་བདུད་རྩིའི་ལེའུ་སྟེ་བཅུ་གསུམ་པ།
༁ྃ༔ ག་རུ་ཊ་ལ་ན་མོ༔ ་ཁྱུང་དཀར་ལ་ན་མོ། ཀླུ་དང་ས་བདག་འཁྲུགས་པ་ཡིས༔ འབམ་ནད་དཀར་ནག་ཁྲ་གསུམ་འབྱུང་༔ རླུང་དང་བད་ཀན་འདུ་བ་འཁྲུགས༔ ངན་ཁྲག་ཆུ་སེར་ཐོག་བབ་ཁྲོ༔ ཆུ་ནི་དམར་སེར་སྔོ་རྒོད་སྟོན༔ རྩ་ནི་སྦོམ་དྲག་རྒྱུ་བ་དཀའ༔ ཁྱུང་ཆེན་དཀར་པོའི་བདུད་རྩི་བསྟན༔ གྷི་ཧང་གུར་གུམ་ཅུ་གང་གསུམ༔ ཙན་དན་དཀར་དམར་ཨ་ག་རུ༔ ཛཱ་ཏི་ལི་ཤི་སྙིང་ཞོ་ཤ༔ ཨུཏྤལ་གསེར་མེ་བྲག་ཞུན་དང་༔ མ་ནུ་འུ་སུ་འབྲས་བུ་གསུམ༔ ཆུ་སེར་སྨན་གསུམ་རྒྱ་མཚལ་དང་༔ ཀ་ར་སྦྱར་བས་འབམ་གྱི་རིགས༔ ངན་ཁྲག་ཆུ་སེར་སྟོད་རྒྱས་དང་༔ རྐང་འབམ་དཀར་ནག་ཁྲ་གསུམ་ལ༔ ཐེབས་པས་ཆོག་པའི་བདུད་རྩི་ཡིན༔ ཁྱུང་དཀར་བདུད་རྩིའི་སྦྱོར་བའོ༔ ཕྲིན་ལས་ཁྱུང་དཀར་བདུད་རྩིའི་ལེའུ་སྟེ་བཅུ་གསུམ་པའོ༔
༄། །ཁྱུང་ནག་བདུད་རྩིའི་ལེའུ་སྟེ་བཅུ་བཞི་པ།
༁ྃ༔ ག་རུ་ཊ་ལ་ན་མོ༔ ་ཁྱུང་ནག་ལ་ན་མོ། ཀླུ་གཉན་འཁྲུགས་པས་དྲེག་གྲུམ་དང་༔ རྐང་འབམ་ཆུ་སེར་ནག་པོ་འབྱུང་༔ རྒྱུ་ནི་ཆུ་སེར་སྨུག་པོའི་རྐྱེན༔ རྟགས་ནི་ཚ་གྲང་སྣ་ཚོགས་བསྟན༔ ནུབ་མོ་གཉིད་ཡེར་གཟེར་
46-15-7a
འབོག་འཁྲུལ༔ ཆུ་ནི་དམར་སེར་སྐྱ་ལ་བཤལ༔ རྩ་ནི་འཁྲུག་འཁྱིག་རྒྱུ་བ་དཀའ༔ ནད་ནི་ཚིགས་དང་རུས་རྐང་ཟུག༔ བྱ་ཁྱུང་ནག་པོའི་བདུད་རྩི་སྦྱོར༔ སྨན་ཆེན་གསེར་མདོག་མ་གི་ཏ༔ བོང་ཁྲག་ཡུང་བ་སེང་ལྡེང་དང་༔ ཆུ་སེར་སྨན་གསུམ་འབྲས་བུ་གསུམ༔ དམར་མོ་གསུམ་དང་བྲག་ཞུན་དང་༔ སླེ་ཏྲེས་དངུལ་ཆུ་ཀ་ར་སྦྱར༔ དྲེག་གྲུམ་ཆུ་སེར་རྐང་འབམ་འཇོམས༔ ཚིགས་དང་རུས་རྐང་ཟུག་པ་སེལ༔ ཁྱུང་ནག་བདུད་རྩིའི་སྦྱོར་བའོ༔ ཁྱུང་ནག་བདུད་རྩིའི་ལེའུ་སྟེ་བཅུ་བཞི་པའོ༔
༄། །རྡོ་རྗེ་ཁྱུང་ཁྲའི་སྨན་སྦྱོར་གྱི་ལེའུ་སྟེ་བཅོ་ལྔ་པ།
༁ྃ༔ ག་རུ་ཊཿལ་ན་མོ༔ ་ཁྱུང་ཁྲ་ལ་ན་མོ། གནོད་སྦྱིན་བཙན་གྱི་ཚ་གྲང་འཐབས༔ སྲིན་བུ་ཡ་མ་དཀར་ནག་འབྱུང་༔ རྩ་དང་ཆུ་ལ་སྣ་ཚོགས་སྟོན༔ ཚ་རྩག་རྒྱུག་ལ་མངར་གྱིས་གནོད༔ བྱ་ཁྱུང་ཁྲ་བོའི་སྦྱོར་བ་བསྟན༔ བོང་ང་ཨ་རུ་མ་གི་ཏ༔ མེ་རུ་ཙེ་དང་བྱི་ཏང་ཀ༔ ་རྒོ་བ་སྟགའུ་ཆུང་གཉིས་ཟེར། གུ་གུམ་ཤུ་དག་རུ་རྟ་དང་༔ ཕུར་མང་ཐོ་བ་ཐང་བུ་ཆུང་༔ ཚ་གྲང་རྟ་སྦྱར་སྲིན་གྱི་ནད༔ ཡ་མ་དཀར་ནག་ཁྲ་གསུམ་ལ༔ གནམ་ལྕགས་རྡོ་རྗེའི་ཐོག་དང་འདྲ༔ ཁྱུང་ཁྲ་བདུད་རྩིའི་སྦྱོར་བའོ༔ རྡོ་རྗེ་ཁྱུང་ཁྲའི་སྨན་སྦྱོར་གྱི་ལེའུ་སྟེ་བཅོ་ལྔ་པའོ༔
༄། །རིགས་གསུམ་མགོན་པོའི་བདུད་རྩིའི་ལེའུ་སྟེ་བཅུ་དྲུག་པ།
༁ྃ༔ རིགས་གསུམ་མགོན་པོ་ལ་ན་མོ༔ 
46-15-7b
མ་མོ་འཁྲུགས་པས་རིམས་ནད་ན༔ ཁ་སྣ་ཚ་ལ་སྦྲིད་པ་འབྱུང་༔ རུས་རྐང་གཟེར་ལ་ཚིགས་བཞི་ན༔ སྣ་ཆུ་འཛག་ལ་གློ་མང་ལུ༔ རེས་འགའ་མཁྲིས་པའི་རྩ་རུ་རྒྱུག༔ ནག་པོ་གསུམ་འགྲིལ་བདུན་དྲུག་བྱེད༔ ཆུ་ནི་སྔོ་རྒོད་དམར་བའོ༔ རྩ་ནི་ཕྲ་གྲིམ་སྤུན་པའོ༔ མ་སྨིན་དུས་སུ་ཐང་འདི་གཏང་༔ འབྲས་བུ་གསུམ་དང་སླེ་ཏྲེས་དང་༔ དྷེ་ཝ་མ་ནུ་ལི་གྭ་དུར༔ བཙོད་དང་སྟག་ཤ་པར་པ་ཏ༔ འདུས་ཐང་རིམས་ཚད་སྨིན་ཅིང་གསོད༔ དེ་རྗེས་ཕྱེ་མའི་སྦྱོར་བ་ནི༔ རིགས་གསུམ་མགོན་པོའི་བདུད་རྩི་བསྟན༔ གྷི་ཧང་ཙན་དན་སྤྱན་གཟིགས།གུར་གུམ་གསུམ༔ ་རིགས་གསུམ་མགོན་པོ་གཙོ་བོ་ཡིན་ཆ་གསུམ་གཏང་། གླ་རྩི་གང་འཛིན་ཨ་རུ་ར༔ གསེར་མེ་ཧོང་ལེན་བ་ཤ་ཀ༔ གུར་གུམ་བྲག་ཞུན་ཏིྒྟ་གསུམ༔ གཡའ་ཀྱི་བོང་དཀར་པར་པ་ཏ༔ ཀ་ར་སྦྱར་བས་ཚད་རིམས་དང་༔ གཉན་རིམས་མཁྲིས་པ་རྩར་རྒྱུག་དང་༔ མེ་ལྟར་འབར་བའི་ཚད་རིམས་ལ༔ ཟླ་ཟེར་ཆུ་རྒྱུན་ཆར་ཆེན་འདིས༔ མེ་ཐོག་ཆུ་བཞིན་ཞི་བར་འགྱུར༔ རིགས་གསུམ་མགོན་པོའི་བདུད་རྩིའི་ལེའུ་སྟེ་བཅུ་དྲུག་པའོ༔
༄། །མཁའ་འགྲོ་བདུད་རྩིའི་ལེའུ་སྟེ་བཅུ་བདུན་པ།
༁ྃ༔ དྷེ་ཝི་རེ་མ་ཏི་ཛ་བྷྱོ༔ ་ལྷ་མོ་རེ་མ་ཏི་ལ། མ་མོ་འཁྲུགས་པས་དམར་བཤལ་འབྱུང་༔ རིམས་ལ་རྐྱེན་པས་མཁྲིས་མཆིན་གཟེར༔ རྒྱུ་ལོང་གྲི་ཡིས་གཏུབ་སྙམ་བྱེད༔ 
46-15-8a
ཆུ་ནི་དམར་སེར་རུལ་བ་སྟོན༔ རྩ་ནི་ཕྲ་གྲིམ་མགྱོགས་པར་འཕར༔ ཁྲོ་བོ་བདུད་རྩིའི་སྨན་སྦྱོར་བསྟན༔ དོམ་མཁྲིས་བྲག་ཞུན་གངས་འཛིན་གསུམ༔ ཨ་རུ་གསེར་མདོག་མ་གི་ཏ༔ གི་ཧང་དུག་ཉུང་བོང་ང་དཀར༔ རྩི་དམར་ཁུར་ཙ་བ་ལེ་ཀ༔ རྒུ་དྲིལ་སྟོང་ཟིལ་ཆུ་སྲིན་སྡེར༔ ཐོག་རུས་རི་བོང་ཀླད་པ་སྦྱར༔ དམར་བཤལ་རྒྱ་ནད་རྒྱུ་གཟེར་འཇོམས༔ རྒྱུ་ཚད་ཁྲག་མཁྲིས་འཁྲུ་བ་གཅོད༔ མཁའ་འགྲོ་བདུད་རྩིའི་སྦྱོར་བའོ༔ མཁའ་འགྲོ་བདུད་རྩིའི་ལེའུ་སྟེ་བཅུ་བདུན་པའོ༔
༄། །མཁའ་འགྲོ་བདུད་རྩིའི་སྦྱོར་བའི་ལེའུ་སྟེ་བཅོ་བརྒྱད་པ།
༁ྃ༔ དྷཱ་ཀི་ནཱི་ཧ་རི་ནི་ས་ལ་ན་མོ༔ ་མཁའ་འགྲོ་ལ་ན་མོ། མ་མོ་ཁྲོས་པས་འབྲུམ་བུ་འབྱུང་༔ དམར་སེར་ཁྲག་རིམས་འབྲུམ་ནག་ན༔ མི་ཐོག་སྟིམ་པས་སུམ་གཉིས་འཆི༔ གཉན་དང་ཚ་བའི་ནད་དང་སྡོང་༔ ཆུ་མདོག་དམར་སེར་ཚ་ལྡོག་བྱེད༔ རྩ་ནི་གྲིམ་ལ་མགྱོགས་པར་འཕར༔ མགོ་དང་རུས་རྐང་ཁོལ་ཞིང་གཟེར༔ དང་ཁ་མི་བདེ་འཁྲུ་སྐྱུགས་བྱེད༔ དྷཱ་ཀི་བདུད་རྩིའི་སྨན་སྦྱོར་བསྟན༔ བོང་ང་གངས་འཛིན་ཨ་རུ་ར༔ གླ་རྩི་ཤུ་དག་གུ་གུལ་དང་༔ གི་ཧང་ཙནྡན་རྒྱ་མཚལ་དང་༔ བྲག་ཞུན་གསེར་མེ་སྐྱུ་རུ་ར༔ སྤྱི་བཞུར་བ་རུ་སེང་ལྡེང་དང་༔ བ་ཤ་ཀ་དང་སྐྱེར་ཤུན་སྦྱར༔ འབྲུམ་བུ་དཀར་ནག་ཕྲ་གསུམ་སེལ༔ 
46-15-8b
དྷཱ་ཀི་པཉྩིའི་སྦྱོར་བའོ༔ མཁའ་འགྲོ་བདུད་རྩིའི་སྦྱོར་བའི་ལེའུ་སྟེ་བཅོ་བརྒྱད་པའོ༔
༄། །བདུད་རྩི་འཁྱིལ་པའི་སྨན་སྦྱོར་གྱི་ལེའུ་སྟེ་བཅུ་དགུ་པ།
༁ྃ༔ ཨ་མྲྀ་ཏ་ཀུཎྜ་ལཱི་ཧཱུྃ༔ ་བདུད་རྩི་འཁྱིལ་པ་ལ་ན་མོ། བྱང་སྨན་གནོད་པས་རིམས་དང་བེ་གེ་འབྱུང་༔ མགོ་དང་ཡན་ལག་ཚིགས་བཞི་ན༔ ཞེ་ལོག་འཁྲུ་སྐྱུགས་ཡི་ག་འཁྲུལ༔ ཆུ་ནི་དམར་སེར་སྔོན་པོ་སྟོན༔ རྩ་ནི་གྲིམ་མགྱོགས་སྤུན་པའོ༔ ཨ་མྲྀ་ཏ་ཡི་སྦྱོར་བ་བསྟན༔ སྨན་ཆེན་འཛིན་པ་ཨ་རུ་ར༔ རུ་རྟ་ཤུ་དག་མ་གི་ཏ༔ གུ་གུམ་ཙནྡན་གི་ཧང་དང་༔ གསེར་མེ་ཏིྒྟ་བྲག་ཞུན་དང་༔ ཧོང་ལེན་བོང་དཀར་པྲི་ཡང་ཀུ༔ སྐྱུ་རུ་བ་ཤ་པར་པ་ཏ༔ ཀ་ར་སྦྱར་བས་སིབ་རིམས་དང་༔ གཉན་རིམས་དག་ནི་སེལ་བའི་མཆོག༔ སིབ་རིམས་འཇོམས་པའི་བདུད་རྩི་ཡིན༔ ཨ་མྲྀ་ཏ་ཡི་སྦྱོར་བའོ༔ བདུད་རྩི་འཁྱིལ་པའི་སྨན་སྦྱོར་གྱི་ལེའུ་སྟེ་བཅུ་དགུ་པའོ༔
༄། །རྡོ་རྗེ་ཕུར་པའི་སྨན་སྦྱོར་གྱི་ལེའུ་སྟེ་ཉི་ཤུ་པ།
༁ྃ༔ བཛྲ་ཀཱི་ལ་ཡ་ལ་ན་མོ༔ ་རྡོ་རྗེ་ཕུར་པ་ལ་ན་མོ། ས་བདག་གནོད་པས་མགུལ་འགགས་ན༔ མགུལ་འགགས་སྲིན་པོའི་ལྕེ་སྐྲངས་ནས༔ སྐེ་འགགས་འབུ་རུ་དཀར་ནག་བུད༔ ཆུ་ནི་དམར་སེར་སྔོ་རྒོད་འབྱུང་༔ རྩ་ནི་ཐུང་རྩུབ་འབུར་བའོ༔ རྡོ་རྗེ་ཕུར་པའི་སྨན་སྦྱོར་བསྟན༔ བི་ཥ་འདྲེ་འཇིགས་རྣམ་རྒྱལ་གསུམ༔ ཆུ་གཉེར་རུས་ཆེན་མ་གི་ཏ༔ གསེར་རྩི་གངས་འཛིན་བྱི་ཏང་ཀ༔ ཝ་ཏ་མིང་ཆེན་སྟག་ཤ་
46-15-9a
དང་༔ ངང་པ་གསེར་རྒོང་སྤྱང་ལྕེ་སྦྱར༔ གཉན་ནད་སྲིན་བུ་ལྕེ་སྐྲངས་དང་༔ གག་པའི་ནད་དང་མགུལ་འགགས་ནད༔ གནམ་ལྕགས་རྡོ་རྗེའི་ཐོག་དང་མཚུངས༔ རྡོ་རྗེ་ཕུར་པའི་སྨན་སྦྱོར་རོ༔ རྡོ་རྗེ་ཕུར་པའི་སྨན་སྦྱོར་གྱི་ལེའུ་སྟེ་ཉི་ཤུ་པའོ༔
༄། །གནམ་ལྕགས་རྡོ་རྗེ་མཆུ་ཡི་སྨན་སྦྱོར་གྱི་ལེའུ་སྟེ་ཉེར་གཅིག་པ།
༁ྃ༔ ག་རུ་ཊ་ལ་ན་མོ༔ ་ཁྱུང་དམར་ལ་ན་མོ། ཀླུ་དང་ས་སྲིན་གནོད་པ་ཡིས༔ ལྷོག་པ་དཀར་ནག་ཚ་གྲང་འབྱུང་༔ ཆུ་ནི་དམར་ནག་སྔོ་རྒོད་འབྱུང་༔ རྩ་ནི་རྒྱུག་འདྲ་གཏིང་ན་འགྲིམ༔ འབུ་རུ་གདན་དམར་མགོ་བོ་ནག༔ མགོ་ལ་སྤུ་ཡི་འཕྲུ་ཅན་འབྱུང་༔ འཁྱག་སྣང་བྱེད་ཅིང་འདར་སིར་བཅའ༔ ཙ་རྩག་རྒྱུག་ལ་སེམས་མི་དགའ༔ ཁྱུང་ཆེན་གནམ་ལྕགས་རྡོ་མཆུ་སྦྱར༔ གངས་འཛིན་བོང་ང་གང་ཐང་ཕྲོམ༔ གླ་རྩི་གུ་གུལ་ཨ་རུ་ར༔ རུ་རྟ་ཤུ་དག་སྟོང་རི་ཟིལ༔ མིང་ཆེན་སྟག་ཤ་ཨ་བྱག་དང་༔ གི་ཧང་ཅུ་གང་རྒྱ་མཚལ་དང་༔ དངུལ་ཆུ་སྦྱར་བས་ལྷོག་པའི་རིགས༔ དཀར་ནག་ཚ་གྲང་མེད་པ་ལ༔ གནམ་ལྕགས་འབར་བའི་ཐོག་དང་འདྲ༔ བྱ་ཁྱུང་གནམ་ལྕགས་རྡོ་རྗེ་མཆུ་ཡི་སྦྱོར་བའོ༔ གནམ་ལྕགས་རྡོ་རྗེ་མཆུ་ཡི་སྨན་སྦྱོར་གྱི་ལེའུ་སྟེ་ཉེར་གཅིག་པའོ༔
༄། །དཔལ་ཆེན་རྡོ་རྗེའི་སྨན་སྦྱོར་གྱི་ལེའུ་སྟེ་ཉེར་གཉིས་པ།
༁ྃ༔ ཤྲཱི་བཛྲ་ཧེ་རུ་ཀ་ལ་ན་མོ༔ གཞི་བདག་ཁྲོས་པས་གཉན་ནད་སྐྲངས་པ་བཅའ༔ སྐྲངས་མདོག་དམར་ནག་སྔོ་སྐྱ་འབྱུང་༔ ཆུ་ནི་
46-15-9b
དམར་སྔོ་མེ་ཏོག་ཡལ༔ རྩ་ནི་འཁྱིག་ལ་རགས་པར་འཕར༔ ཁོལ་བུར་སྐྲངས་ལ་དམ་རྒྱས་ཚ་དབལ་བྱེད༔ རྡོ་རྗེ་དཔལ་ཆེན་སྨན་སྦྱོར་བསྟན༔ བོང་ནག་གུ་གུལ་མ་གི་ནག༔ འཛིན་པ་ཤུ་དག་ཨ་རུ་ར༔ ཨ་བྱག་སྤྲུ་ནག་དུག་པུཥྤེ༔ སྟག་ཤ་མིང་ཆེན་ལྕགས་ཀྱུ་བ༔ གཉན་འདུལ་ཤུག་ཚེར་བྲག་གཅུང་སྦྱར༔ གཉན་ནད་འདུལ་བའི་ཐོ་ཆེན་ཡིན༔ གཉན་སྐྲངས་འདུལ་བའི་དཔའ་བོ་ཡིན༔ དཔལ་ཆེན་རྡོ་རྗེའི་སྦྱོར་བའོ༔ དཔལ་ཆེན་རྡོ་རྗེའི་སྨན་སྦྱོར་གྱི་ལེའུ་སྟེ་ཉེར་གཉིས་པའོ༔
༄། །རྨ་བྱ་ཆེན་མོའི་ལེའུ་སྟེ་ཉེར་གསུམ་པ།
༁ྃ༔ རྨ་བྱ་ཆེན་མོ་ལ་ན་མོ༔ ཐིལ་འདྲེ་བསྡོངས་པས་སྦྱར་དུག་བླུད༔ རླུང་མཁྲིས་བད་ཀན་འདུ་ལ་བསྡོང་༔ ནད་ངོས་མི་ཟིན་འགྱུར་ལྡོག་མང་༔ ཆུ་མདོག་མེ་ཏོག་སྣ་ཚོགས་སྟོན༔ རྩ་ནི་འཚུབས་སྤུན་ངེས་པ་མེད༔ རྨ་བྱ་ཆེན་མོའི་སྨན་སྦྱོར་བསྟན༔ རྨ་བྱ་གླང་ཆེན་གླ་བ་སྤྲུལ༔ སྲོག་ཆགས་ལ་སོགས་གནས་པ་ཡི༔ དབང་པོ་རིལ་བུ་ཞེས་བྱ་བ༔ རྐྱང་པ་བཏང་བས་སྦྱར་དུག་ཐུབ༔ ཨ་རུ་ཀོ་ཋ་སྐྱེར་ཤུན་ཀ་ར་དང་༔ བ་རུ་སྐྱུ་རུ་སླེ་ཏྲེས་དང་༔ ཐང་བཏང་སྦྱར་དུག་སྨིན་པར་བྱེད༔ དེ་ནས་བདུད་རྩི་འཆི་མེད་སྦྱོར༔ ཅོང་ཞི་གི་ཧང་མ་གི་ཏ༔ བཟང་དྲུག་ཨ་རུ་རྒྱ་མཚལ་དང་༔ སུག་སྨེལ་བསེ་རུ་འཕུར་ལྷེབ་དང་༔ དཔའ་བོ་དཀར་པོ་ཀ་ར་སྦྱོར༔ སྦྱར་དུག་འཇོམས་པའི་བདུད་རྩི་ཡིན༔ 
46-15-10a
རྨ་བྱ་བདུད་རྩིའི་སྦྱོར་བའོ༔ རྨ་བྱ་ཆེན་མོའི་ལེའུ་སྟེ་ཉེར་གསུམ་པའོ༔
༄། །ཟླ་ཟེར་དུག་འཇོམས་བདུད་རྩིའི་ལེའུ་སྟེ་ཉེར་བཞི་པ།
༁ྃ༔ ཤྲཱི་མ་ཧཱ་ཀཱ་ལ་ཡ་ན་མོ༔ ་མགོན་པོ་ལ་ན་མོ། ཟས་མ་འཕྲོད་པས་དུག་ནད་ནི༔ ཕོ་མཆིན་རྒྱུ་ལང་ལྟེ་སྐོར་ན༔ བཟོད་མི་ཐུབ་པ་འཁྲུ་སྐྱུགས་བྱེད༔ རྩ་དང་ཆུ་ལ་ངེས་པ་མེད༔ ཟླ་ཟེར་དུག་འདུལ་སྦྱོར་བ་བསྟན༔ ཟླ་བ་གཅིག་ཐུབ་འཕུར་སླེབ་དང་༔ ་ཅོང་ཞིག་དཀར་པོ། བྲག་ཇ།་ཨ་ཝོ་གཅིག་ཐུབ་བོང་ང་དཀར༔ ལྕགས་ཕྱེ་སྐྱེར་ཞུན་འོམ་བུ་དང་༔ དཔའ་བོ་ཡུང་བ་མ་གི་ཏ༔ གྲོ་འབྲས་ཨུག་ཆོས་བྱི་ཏང་ཀ༔ དམར་གསུམ་བཙོད་རྒྱ་སྐག་འབྲི་མོག།སྨྱ་ལོ་སྦྲང་དང་སྦྱར༔ དུག་ནད་ཚ་གྲང་མེད་པར་འཇོམས༔ གྱུར་དུག་ཤ་དུག་གླང་ཐབས་དུག་ནད་དང་༔ ཟས་མ་འཕྲོད་པའི་དུག་ནད་ཐམས་ཅད་ལ༔ ཟླ་བའི་འོད་ཀྱིས་མུན་པ་སེལ་བཞིན་ནོ༔ ཟླ་ཟེར་བདུད་རྩིའི་སྦྱོར་བའོ༔ ཟླ་ཟེར་དུག་འཇོམས་བདུད་རྩིའི་ལེའུ་སྟེ་ཉེར་བཞི་པའོ༔
༄། །རྡོ་རྗེ་སྲ་ཡི་སྨན་སྦྱོར་གྱི་ལེའུ་སྟེ་ཉེར་ལྔ་པ།
༁ྃ༔ བཛྲ་ཕ་ལམ་ལ་ན་མོ༔ ་རྡོ་རྗེ་ཕ་ལམ་ཞེས་བྱའོ། ཁྱི་ཕག་ལ་སོགས་སྲོག་ཆགས་ཀྱི༔ འབྲས་བུ་བཅད་པའི་རྣམ་སྨིན་གྱིས༔ རོ་རྩ་མ་ནིང་མཁལ་ནད་འབྱུང་༔ རྡོ་རྗེ་ཕ་ལམ་སྦྱོར་བ་བསྟན༔ དབང་ལ་གཅོང་ཞི་གསེར་མདོག་གསུམ༔ ཛཱ་ཏི་ལི་ཤི་སུག་སྨེལ་གསུམ༔ བྱ་ཕོ་རྩང་ཕག་སྲམ་ཤ་གསུམ༔ ཤ་འབྲས་ལུག་འབྲས་
46-15-10b
ར་འབྲས་གསུམ༔ ར་མཉེ་ཉེ་ཤིང་ལྕ་བ་གསུམ༔ སྦྲུལ་ཤ་གླ་རྩི་ཐལ་དཀར་གསུམ༔ དབྱར་རྩ་དགུན་འབུ་ཀ་ར་གསུམ༔ བུ་རམ་སྦྲང་རྩི་སྦྱར་བ་ནི༔ ཆང་དང་འོ་མས་ཕུལ་ལ་གཏང་༔ བུད་མེད་བརྒྱ་ལ་སྤྱོད་པར་ནུས༔ ཚེ་རིང་སྟོབས་རྒྱས་བུ་རྒྱུད་འཕེལ༔ རྡོ་རྗེ་ཕ་ལམ་སྦྱོར་བའོ༔ རྡོ་རྗེ་སྲ་ཡི་སྨན་སྦྱོར་གྱི་ལེའུ་སྟེ་ཉེར་ལྔ་པའོ༔
༄། །མཁའ་འགྲོ་བདུད་རྩིའི་སྨན་སྦྱོར་གྱི་ལེའུ་སྟེ་ཉེར་དྲུག་པ།
༁ྃ༔ དྷཱ་ཀི་སིདྡྷི་ཛ༔ ་མཁའ་འགྲོའི་དངོས་གྲུབ་སྩོལ། མཛོ་མོའི་རྟོ་ལེ་བླངས་པ་དང་༔ ཡུ་མོའི་ཤིའུ་ཆུང་བསད་པ་ཡི༔ དེའི་ལན་ཆགས་མོ་ནད་རབས་ཆད་འབྱུང་༔ མངལ་ཁྲག་སྟོད་ཕྱུར་སྙིང་སྲོག་གཟེར༔ མགོ་དང་ཡན་ལག་ན་བ་ཡིན༔ མཁལ་རྐེད་རྒྱུ་ལོང་ཚ་རབ་ན༔ ་ངུ་སྙིང་འདོད། སྙིང་མི་དགའ་ལ་ཚིག་པ་ཟ༔ དྷཱ་ཀི་སིདྡྷིའི་སྦྱོར་བ་བསྟན༔ འབྲས།་སྨྱུག་ཚིགས་སུག་སྨེལ་འཕང་མའི་འབྲུ༔ ་ཁྱི་ཤིང་འབྲས་བུ་ཟེར། གཟེ་མ་ལྕམ་པ་སྡིག་སྲིན་དང་༔ འབྲས་སྨད་འབྲས།སྣ་གསུམ་དང་དམར་པོ་གསུམ༔ ཀ་ར་བུ་རམ་རྟ་ལ་སྦྱར༔ མོ་ནད་དཀར་ནག་ཁྲ་གསུམ་སེལ༔ སྲིད་འཕེལ་མྱུར་དུ་བུ་དང་འཕྲད༔ དྷཱ་ཀི་སིདྡྷིའི་སྨན་སྦྱོར་རོ༔ མཁའ་འགྲོ་བདུད་རྩིའི་སྨན་སྦྱོར་གྱི་ལེའུ་སྟེ་ཉེར་དྲུག་པའོ༔
༄། །རཏྣ་བསམ་འཕེལ་གྱི་སྨན་སྦྱོར་གྱི་ལེའུ་སྟེ་ཉེར་བདུན་པ།
༁ྃ༔ རཏྣ་པུཎྱེ་ལ་ན་མོཿ་བསམ་འཕེལ་ནོར་བུ་ལ་ན་མོ། མ་བྱིན་ཕྲོགས་པའི་རྣམ་སྨིན་གྱིས༔ ཆུང་སྲི་ཁ་དར་བུ་ཕྲུག་འཆི༔ དེ་ཡི་སྡིག་
46-15-11a
སྒྲིབ་དག་པའི་ཕྱིར༔ གྲྭ་ལྔ་འདོན་ལ་ཆུ་གཏོར་གཏང་༔ ནོར་བུ་བསམ་འཕེལ་སྦྱོར་བ་བསྟན༔ གི་ཧང་གུ་གུལ་མ་གི་ཏ༔ ཙནྡན་དཀར་དམར་བཟང་དྲུག་འབྲས་བུ་གསུམ༔ སྙིང་བུ་ཞོ་ཤ་ཡུངས་དཀར་དང་༔ བོང་དཀར་བུ་རམ་སྦྲང་རྩི་སྦྱར༔ བྱིས་པའི་གདོན་ཆེན་བཅོ་ལྔ་འཇོམས༔ ཚ་གྲང་ནད་རིགས་ཀུན་ལ་མཆོག༔ འཆི་མེད་རྡོ་རྗེ་འགྲུབ་པར་འགྱུར༔ ནོར་བུ་བསམ་འཕེལ་སྦྱོར་བའོ༔ རཏྣ་བསམ་འཕེལ་གྱི་སྨན་སྦྱོར་གྱི་ལེའུ་སྟེ་ཉེར་བདུན་པའོ༔
༄། །སྤྱི་འདུས་ཀྱི་ལེའུ་སྟེ་ཉེར་བརྒྱད་པ།
༁ྃ༔ གུ་རུ་མཚོ་སྐྱེས་རྡོ་རྗེ་ལ་ན་མོ༔ ་བླ་མ་པདྨ་འབྱུང་གནས་ལ་ཕྱག་འཚལ་ལོ། །ད་ནི་འཇིག་རྟེན་མི་ཡི་ལུས༔ ་དལ་འབྱོར་མི་ལུས་ལ་ཟེར། སྟོད་སྨད་ཕྱི་ནང་བར་གསུམ་གྱི༔ དོན་ལྔ། སྣོད་དྲུག།བཅུ་གཉིས་ལ་སོགས་པའི༔ རང་རང་གཉེན་པོའི་སྨན་སྦྱོར་བསྟན༔ མགོ་ལ༔ མི་ཐོད་འབྲུག་རུས་དང་༔ ཏིགྟ་སྡེབ་པས་མགོ་ཚད་སེལ༔ མིག་ལ༔ ལྕགས་ཕྱེ་ཨ་ཝ་དང་༔ སྐྱེར་ཤུན་སྡེབ་པས་མིག་ནད་སེལ༔ རྣ་བ་ལ༔ ཨུག་ཆོས་རུ་རྟ་ཨ་རུ་ར༔ སྙིང་ལ༔ ཛཱ་ཏི་ལི་ཤི་ཨ་ག་རུ༔ གློ་བ་ལ༔ ཅུ་གང་ཙནྡན་ཨ་ཀྲོང་ཀ༔ མཆིན་པ་ལ༔ གི་ཧང་གུར་གུམ་བྲག་ཞུན་དང་༔ མཁྲིས་པ་ལ༔ གསེར་མེ་ཏིག་ཏ་རམ་རྩི་བ༔ མཚེར་པ་ལ༔ ཨ་རུ་ཚེ་སྡུམ་ཀ་ཀོ་ལ༔ མཁལ་མ་ལ༔ ཨ་རུ་
46-15-11b
སུག་སྨེལ་མཁལ་མ་ཞོ་ཤ་དང་༔ རྒྱུ་མ་ལ༔ བྲག་ཞུན་དོམ་མཁྲིས་གླ་རྩི་དང་༔ ལྒང་པ་ལ༔ གཟེ་མ་ལྕམ་པ་སྡིག་སྲིན་དང་༔ བསམ་སེའུ་ལ༔ དབང་ལག་བྱ་ཕོའི་ཤ་ཨ་རུ་ར༔ སྤྱི་འདུས་ཀྱི་ལེའུ་སྟེ་ཉེར་བརྒྱད་པའོ༔
༄། །དྲག་པོ་རྩལ་གྱི་སྨན་སྦྱོར་གྱི་ལེའུ་སྟེ་ཉེར་དགུ་པ།
༁ྃ༔ གུ་རུ་དྷེ་ཝ་དྷཱ་ཀི་ནཱི་ལ་ན་མོ༔ ་བླ་མ་ཡི་དམ་མཁའ་འགྲོ་ལ་ཕྱག་འཚལ་ལོ། །གནམ་ཐིལ་གནོད་པས་མགོ་གཟེར་འབྱུང་༔ མགོ་བོ་གཟེར་ལ་མིག་རྩ་དམར༔ ཀླད་པའི་དཀྱིལ་ནས་གཟེར་ཤར་རྒྱུག༔ སྣ་ཁྲག་ཟག་པས་དབང་པོ་འཐིབ༔ ཆུ་ནི་དམར་སེར་སྔོ་རྒོད་སྟོན༔ རྩ་ནི་གྲིམ་ལ་མགྱོགས་པར་འཕར༔ དེ་ནི་མགོ་གཟེར་ལོང་བའི་ནད༔ ཐོད་ཕྲེང་རྩལ་གྱི་ཐང་སྦྱོར་བསྟན༔ མི་ཐོད་ཏིག་ཏ་འབྲུག་རུས་དང་༔ འབྲས་བུ་གསུམ་དང་དམར་པོ་གསུམ༔ ཙནྡན་གུར་གུམ་བྲག་ཞུན་གསུམ༔ མ་ནུ་སླེ་ཏྲེས་སྟག་ཤ་གསུམ༔ གུ་གུལ་སྦྱར་བའི་ཐང་སྨན་འདིས༔ མགོ་གཟེར་སྟོད་ཚད་སྟེང་གདོན་དང་༔ ཟུག་གཟེར་ཁྲག་མཁྲིས་མགོ་ནད་སེལ༔ དེ་རྗེས་ཕྱེ་མའི་སྦྱོར་བ་ནི༔ དྲག་པོ་རྩལ་གྱི་སྦྱོར་བ་བསྟན༔ གི་ཧང་གུ་གུལ་མ་གི་ཏ༔ གངས་འཛིན་ཙནྡན་དཀར་དམར་དང་༔ ཨ་རུ་གཡའ་ཀྱི་ཏིག་ཏ་དང་༔ མི་ཐོད་ཐོག་རུས་ཡང་ཟེར།སྦྱར་བས་ཀླད་གཟེར་དང་༔ གཉན་ཚད་མགོ་གཟེར་སྲིན་ནད་དང་༔ སྟེང་གདོན་ཀླད་གཟེར་ཐམས་ཅད་འཇོམས༔ པདྨ་དྲག་
46-15-12a
པོའི་སྨན་སྦྱོར་རོ༔ དྲག་པོ་རྩལ་གྱི་སྨན་སྦྱོར་གྱི་ལེའུ་སྟེ་ཉེར་དགུ་པའོ༔
༄། །ཕྱག་ན་རྡོ་རྗེའི་བདུད་རྩིའི་སྦྱོར་བའི་ལེའུ་སྟེ་སུམ་ཅུ་པ།
༁ྃ༔ བཛྲ་པཱ་ཎི་ལ་ན་མོ༔ ་ཕྱག་ན་རྡོ་རྗེ་ལ་ཕྱག་འཚལ་ལོ། །རྒྱལ་སྲིན་མ་མོའི་གནོད་པ་ཡིས༔ སྙིང་གཟེར་སྨྱོ་འབོག་བརྒྱལ་ནད་ན༔ དྲན་མེད་བརྒྱལ་ལ་འབྲུ་ཚུགས་བལྟ༔ ཆུ་ནི་དཀར་སྔོ་རླུང་རྟགས་བསྟན༔ རྩ་ནི་རགས་ལ་བླ་གནས་ཞར༔ ཕྱག་ན་རྡོ་རྗེའི་སྨན་སྦྱོར་བསྟན༔ གུ་གུལ་ཨ་ཀར་ཙནྡན་གཉིས༔ ཅུ་གང་གུར་གུམ་སྤོས་དཀར་དང་༔ རུ་རྟ་ཨ་རུ་གེ་སར་གསུམ༔ ཛཱ་ཏི་ལི་ཤི་སྙིང་ཞོ་ཤ༔ གི་ཧང་གླ་རྩི་འཛིན་པ་དང་༔ བ་རུ་སྐྱུ་རུ་ཀ་ར་སྦྱར༔ སྙིང་ཚད་སྨྱོ་འབོག་ཏྲེ་ཧོ་དང་༔ སྙིང་གཟེར་སེལ་བའི་བདུད་རྩི་ཡིན༔ རྡོ་རྗེ་འཆང་གི་སྨན་སྦྱོར་རོ༔ ཕྱག་ན་རྡོ་རྗེའི་བདུད་རྩིའི་སྦྱོར་བའི་ལེའུ་སྟེ་སུམ་ཅུ་པའོ༔
༄། །རྟ་མགྲིན་རྒྱལ་པོའི་བདུད་རྩིའི་ལེའུ་སྟེ་སོ་གཅིག་པ།
༁ྃ༔ ཧ་ཡ་གྷྲཱི་ཝ་ལ་ན་མོ༔ ་རྟ་མགྲིན་ལ་ཕྱག་འཚལ་ལོ། །བཙན་རྒོད་ཁྲོས་པས་གློ་ཚད་གཟེར་ཐུང་ན༔ རོ་རྒྱབ་ནུ་འགྱིང་རྩིབ་ལོག་གཟེར༔ ཆུ་མདོག་དམར་སེར་སྔོ་རྒོད་སྟོན༔ རྩ་ནི་འཁྱིགས་གྲིམ་མགྱོགས་པར་འཕར༔ རྟ་མགྲིན་རྒྱལ་པོའི་སྨན་སྦྱོར་བསྟན༔ ཙནྡན་དཀར་དམར་ཅུ་གང་དང་༔ གི་ཧང་སྨན་ཆེན་ཨ་རུ་ར༔ གླ་རྩི་གངས་འཛིན་གུ་གུལ་དང་༔ ཧོང་ལེན་རྩི་དམར་བ་ཤ་ཀ༔ སྲོ་ལོ་འབྲི་མོག་ཤིང་མངར་སྦྱར༔ གློ་ཚད་གཟེར་ཐུང་
46-15-12b
གཉན་གཟེར་དང་༔ གཟེར་རྒོད་ཁྲག་རྣག་ལུ་བ་སེལ༔ ཧ་ཡ་གྲཱི་ཝའི་སྨན་སྦྱོར་རོ༔ རྟ་མགྲིན་རྒྱལ་པོའི་བདུད་རྩིའི་ལེའུ་སྟེ་སོ་གཅིག་པའོ༔
༄། །འཇམ་དཔལ་ཁྲོ་བོའི་སྨན་སྦྱོར་གྱི་ལེའུ་སྟེ་སོ་གཉིས་པ།
༁ྃ༔ ཡ་མཱནྟ་ཀ་ལ་ན་མོ༔ ་གཤིན་རྗེ་གཤེད་ལ་ཕྱག་འཚལ་ལོ། །དམ་སྲིའི་གནོད་པས་མཆིན་ཚད་ཁྲག་རྒྱས་འབྱུང་༔ མཆིན་པ་གཟེར་ལ་མིག་རྩ་དམར༔ ཆུ་ནི་དམར་སེར་སྨུག་ནག་སྟོན༔ རྩ་ནི་སྦོམ་ཁེངས་དྲག་ལས་རྒྱལ༔ གསེར་གྱི་མདོག་ཅན་སྨན་སྦྱོར་བསྟན༔ གི་ཧང་གུར་གུམ་བྲག་ཞུན་དང་༔ ཅུ་གང་རྒྱ་མཚལ་ཙནྡན་དམར༔ གང་ཏིག་ཨུཏྤལ་བ་ཤ་ཀ༔ གསེར་མེ་ཁུར་རྩ་བ་ལེ་ཀ༔ རུ་རྟ་སྐྱུ་རུ་མ་ནུ་དང་༔ རེ་ཀོན་མཚེ་ལྡུམ་འུ་སུ་དང་༔ སུམ་ཅུ་ཏིག་དང་ཀ་ར་སྦྱར༔ མཆིན་ཚད་མཆིན་ནད་ཐམས་ཅད་སེལ༔ སྨུག་པོ་ཁྲག་རྒྱས་འཇོམས་པའི་མཆོག༔ འཇམ་དཔལ་གཤིན་རྗེའི་སྨན་སྦྱོར་རོ༔ འཇམ་དཔལ་ཁྲོ་བོའི་སྨན་སྦྱོར་གྱི་ལེའུ་སྟེ་སོ་གཉིས་པའོ༔
༄། །ཐུགས་རྗེ་ཆེན་པོའི་སྨན་སྦྱོར་གྱི་ལེའུ་སྟེ་སོ་གསུམ་པ།
༁ྃ༔ ལོ་ཀེ་ཤྭ་ར་ལ་ན་མོ༔ ་འཇིག་རྟེན་དབང་ཕྱུག་ལ་ཕྱག་འཚལ་ལོ། །མ་མོ་བྱང་སྨན་གནོད་པ་ཡིས༔ མཁྲིས་ནད་གཤའ་ཡ་མིག་སེར་འབྱུང་༔ མགོ་ན་སྐྱུག་ལོག་ཡི་ག་ཆད༔ ཁ་ཁ་སྐམ་ལ་ཞེ་ཁ་ལོག༔ ཆུ་ནི་དམར་སེར་ནག་པོ་སྟོན༔ རྩ་ནི་ཕྲ་གྲིམ་མགྱོགས་པར་འཕར༔ ཐུགས་རྗེ་ཆེན་པོའི་སྨན་སྦྱོར་རོ༔ གསེར་མེ་གཡའ་ཀྱི་ཏིྒྟ་གསུམ༔ གི་ཧང་སེ་
46-15-13a
རྒོད་དུག་ཉུང་གསུམ༔ རུ་རྟ་རེ་ཀོན་ཟི་ར་གསུམ༔ ཀྱི་ལྕེ་ཧོང་ལེན་པར་པ་ཏ༔ ཨ་རུ་རྩ་མཁྲིས་སྐྱེར་ཤུན་དང་༔ བོང་དཀར་ཀ་ར་སྦྱར་བ་ཡིས༔ མཁྲིས་པ་གཤའ་ཡ་དཀར་ནག་དང་༔ མཁྲིས་ཚད་མིག་སེར་རྩར་རྒྱུག་སེལ༔ ཐུགས་རྗེ་ཆེན་པོའི་སྨན་སྦྱོར་རོ༔ ཐུགས་རྗེ་ཆེན་པོའི་སྨན་སྦྱོར་གྱི་ལེའུ་སྟེ་སོ་གསུམ་པའོ༔
༄། །སེང་གེ་སྒྲ་ཡི་སྨན་སྦྱོར་གྱི་ལེའུ་སྟེ་སོ་བཞི་པ།
༁ྃ༔ སིཾ་ཧ་ནཱ་ད་ལ་ན་མོ༔ ་སེང་གེ་སྒྲ་ལ་ཕྱག་འཚལ་ལོ། །ས་བདག་གནོད་པས་མཚེར་ནད་སྦོས་འཁྲོག་ན༔ མཚེར་ནག་ཁྲག་རྒྱས་ན་བར་བྱེད༔ གཡོན་གྱི་ཕྱོགས་གཟེར་བེར་ལེབ་སྐྲངས༔ ཆུ་ནི་དམར་སེར་སྔོ་རྒོད་སྟོན༔ རྩ་ནི་སྦོམ་རྒྱས་རྒྱུ་བ་དཀའ༔ སེང་གེ་སྒྲ་ཡི་སྨན་སྦྱོར་བསྟན༔ ཨ་རུ་ཀོ་ལ་མཚེ་སྡུམ་གསུམ༔ པི་ལིང་ལི་ཤི་གེ་སར་གསུམ༔ གསེར་མེ་སྤང་སྤོས་སྐྱུ་རུ་ར༔ བ་རུ་སྲད་དཀར་རེ་ཀོན་པ༔ སེང་ལྡེང་སྐྱེར་པ་རྒྱ་མཚལ་དང་༔ ཀ་ར་སྦྱར་བས་མཚེར་པའི་ནད༔ ཚ་གྲང་ཁྲག་རྒྱས་སྦོས་གཟིར་འཇོམས༔ སིང་ཧ་ནཱ་དའི་བདུད་རྩི་འོ༔ སེང་གེ་སྒྲ་ཡི་སྨན་སྦྱོར་གྱི་ལེའུ་སྟེ་སོ་བཞི་པའོ༔
༄། །སེང་གདོང་མའི་སྨན་སྦྱོར་གྱི་ལེའུ་སྟེ་སོ་ལྔ་པ།
༁ྃ༔ སིང་ཧ་མུ་ཁ་ལ་ན་མོ༔ ་སེང་གེའི་གདོང་ཅན་ལ་ཕྱག་འཚལ་ལོ། །ཡུལ་འདྲེའི་གནོད་པས་རྒྱུ་ལོང་ན༔ རྒྱུ་ནད་སྦོས་གཟེར་ཁྲག་ནད་འབྱུང་༔ ཁྲག་དང་སེར་པོ་འཇའ་ཚོན་འཁྲུ༔ 
46-15-13b
རྒྱུ་ལོང་གྲི་ཡིས་གཏུབ་སྙམ་བྱེད༔ མཁའ་འགྲོ་སེང་གེ་བདུད་རྩིའི་སྦྱོར་བ་བསྟན༔ གངས་འཛིན་དོམ་མཁྲིས་བྲག་ཞུན་དང་༔ དུག་ཉུང་གསེར་མེ་རྩི་དམར་དང་༔ རྒྱ་སྣག་སྙ་ལོ་བོང་ང་དཀར༔ གླ་སྒང་སྟོང་ཟིལ་བ་ལེ་ཀ༔ འཇིབ་རྩི་གུར་གུམ་མ་གི་ཏ༔ ཨ་རུ་ཁུར་རྩ་ཆུ་སྲིན་སྡེར༔ ཀ་ར་སྦྱར་བས་རྒྱུ་ལོང་ནད༔ ཁྲག་ནད་དམར་བཤལ་འཇོམས་པར་བྱེད༔ སེང་གེ་དྲག་མོའི་བདུད་རྩི་འོ༔ སེང་གདོང་མའི་སྨན་སྦྱོར་གྱི་ལེའུ་སྟེ་སོ་ལྔ་པའོ༔
༄། །བདུད་རྩི་འཁྱིལ་པའི་སྨན་སྦྱོར་གྱི་ལེའུ་སྟེ་སོ་དྲུག་པ།
༁ྃ༔ ཨ་མྲྀ་ཏ་ས་མུཏྒ་ཏེ་ན་མོ༔ ་བདུད་རྩི་ཡང་དག་པ་ལ་ཕྱག་འཚལ་ལོ། །གྲི་བོའི་གནོད་པས་ཕོ་ནད་འབྱུང་༔ ཕོ་མཆིན་མི་བདེ་གཟེར་ཐུང་བྱེད༔ ལྟེ་སྐོར་གཟེར་ལ་འཁྲུ་སྐྱུག་བྱེད༔ ཨ་མྲྀ་ཏ་ཡི་སྦྱོར་བ་བསྟན༔ རྒྱལ་པོ་བྲག་ཞུན་ཨ་རུ་ར༔ འཇིབ་རྩི་གུར་གུམ་རུ་རྟ་དང་༔ བོང་དཀར་གླ་རྩི་རྒྱ་སྣག་དང་༔ དོམ་མཁྲིས་ག་དུར་སུག་སྨེལ་དང་༔ ཏིྒྟ་ཀ་ར་སྦྱར་བས་ཕོ་ཚད་དང་༔ ཕོ་བའི་ཁྲག་མཁྲིས་གླང་ཐབས་སེལ༔ བདུད་རྩི་འཁྱིལ་པའི་སྨན་སྦྱོར་རོ༔ བདུད་རྩི་འཁྱིལ་པའི་སྨན་སྦྱོར་གྱི་ལེའུ་སྟེ་སོ་དྲུག་པའོ༔
༄། །རྡོ་རྗེ་ཁྱུང་ཆེན་གྱི་སྨན་གྱི་ལེའུ་སྟེ་སོ་བདུན་པ།
༁ྃ༔ བཛྲ་ག་རུ་ཎ་ན་མོ༔ ་རྡོ་རྗེ་ཁྱུང་ཆེན་ཞེས་བྱ་བ་ལ་ཕྱག་འཚལ་ལོ། །ཀླུ་གཉན་གནོད་པས་མཁལ་ནད་ན༔ གཉན་གཟེར་ཚད་པ་སྲིན་བུ་ན༔ མཁལ་རྐེད་གཟེར་ལ་ཚ་ཀྱུ་རྒྱུག༔ 
46-15-14a
ཁྲག་རྒྱས་ལ་ཆུ་ཁ་སྡོམ༔ ཡང་ན་ས་བོན་འཛག་ཀྱང་སྲིད༔ ཆུ་ནི་དམར་སེར་ཉོག་པའོ༔ རྩ་ནི་གྲིམ་འཁྱིལ་ཞར་ལ་རྒྱུག༔ རྡོ་རྗེ་ཁྱུང་གི་སྦྱོར་བ་བསྟན༔ སྨན་ཆེན་ཨ་རུ་སུག་སྨེལ་དང་༔ གུ་གུལ་གླ་རྩི་ཤུག་ཚེར་ཅན༔ གུར་གུམ་ལྕམ་པ་བྲག་ཞུན་དང་༔ མཁལ་མ་ཞོ་ཤ་རྒྱ་སྐག་བཙོད༔ ཤུ་དག་ཏིྒྟ་བ་ཤ་ཀ༔ རྒྱ་མཚལ་ཀ་ར་སྦྱར་བ་ཡིས༔ མཁལ་ཚད་གཉན་གཟེར་སྲིན་ནད་དང་༔ མཁལ་ནད་ཐམས་ཅད་སེལ་བར་བྱེད༔ རྡོ་རྗེ་ཁྱུང་ཆེན་བདུད་རྩི་འོ༔ རྡོ་རྗེ་ཁྱུང་ཆེན་གྱི་སྨན་གྱི་ལེའུ་སྟེ་སོ་བདུན་པའོ༔
༄། །རྡོ་རྗེ་ཕུར་པའི་སྨན་སྦྱོར་གྱི་ལེའུ་སྟེ་སོ་བརྒྱད་པ།
༁ྃ༔ བཛྲ་ཀཱི་ལི་ཀཱི་ལ་ཡ་ལ་ན་མོ༔ ་རྡོ་རྗེ་ཕུར་པ་ཕྱག་འཚལ་ལོ། །ཐེའུ་རང་གནོད་པས་བསམ་སེའུ་དང་༔ ལྒང་པ་སྲིན་དང་ཚ་གྲང་འཐབས༔ རྩ་ཆུ་མ་ངེས་སྣ་ཚོགས་སྟོན༔ ཆུ་ཁ་སྲ་སྙི་སྐྲངས་པ་བཅའ༔ ཚ་ཀྱུ་རྒྱུག་ལ་རྣག་ཁྲག་འཛག༔ རྡོ་རྗེ་ཕུར་པའི་སྦྱོར་བ་བསྟན༔ བོང་ང་གུ་གུལ་ཨ་རུ་ར༔ རུ་རྟ་ཤུ་དག་གླ་རྩི་དང་༔ ཕུར་མོང་རྒྱ་མཚལ་བྱི་ཏང་ཀ༔ རྒྱ་ཤུག་ཀ་ར་སྦྱར་བ་ཡིས༔ ལྒང་ནད་བསམ་སེའུ་ཚ་གྲང་འཐབས༔ གྲང་གཉན་སྲིན་དང་རྣག་ཁྲག་འཛག༔ ཆུ་ཁ་སྲ་སྙི་སྐྲངས་པ་འཇོམས༔ བཛྲ་ཀཱི་ལ་ཡ་ཡི་སྦྱོར་བའོ༔ རྡོ་རྗེ་ཕུར་པའི་སྨན་སྦྱོར་གྱི་ལེའུ་སྟེ་སོ་བརྒྱད་པའོ༔
༄། །སྲུང་འཁོར་སྒོམ་བཟླས་ཀྱི་ལེའུ་སྟེ་སོ་དགུ་པ།
༁ྃ༔ སྨན་གྱི་བླ་ལ་ཕྱག་འཚལ་ལོ༔ 
46-15-14b
ཉོན་ཅིག་ཡེ་ཤེས་མཚོ་རྒྱལ་མ༔ ད་ནི་སྨན་པའི་རང་སྲུང་བསྟན༔ ཧྲཱི༔ རང་ཉིད་སངས་རྒྱས་སྨན་གྱི་བླ༔ དྲང་སྲོང་བརྒྱུད་པའི་བླ་མས་བསྐོར༔ ཕྱི་རིམ་རྡོ་རྗེའི་གུར་ཁང་བསམ༔ ཐུགས་ཀར་ཉི་ཟླའི་དཀྱིལ་འཁོར་དབུས༔ ས་བོན་མ་ཡེངས་ངང་ནས་སྲོག་འདི་བཟླས༔ ཨོཾ་གུ་རུ་བཻ་ཌཱུརྱ་ས་མུངྒ་ཏེ་སྭཱ་ཧཱ༔ བཛྲ་རཀྵ་རཀྵ་སྭཱ་ཧཱ༔ ནད་རིགས་བཞི་བརྒྱ་རྩ་བཞིའི་སྲོག་ལ་མཱ་ར་ཡ་རྦད༔ ཕཊ་རཾ་རཾ་ཕཊ༔ དེ་རྗེས་རང་སེམས་གཅེར་གྱིས་ལྟ༔ མ་ཡེངས་ངང་ནས་མཉམ་པར་གཞག༔ རྡོ་རྗེའི་གུར་ཁང་ལྟ་བུ་འོ༔ སྲུང་འཁོར་སྒོམ་བཟླས་ཀྱི་ལེའུ་སྟེ་སོ་དགུ་པའོ༔
༄། །སྲུང་འཁོར་གྱི་ལེའུ་སྟེ་བཞི་བཅུ་པ།
༁ྃ༔ བཛྲ་བི་རཱ་ར་ཎ་ལ་ན་མོ༔ ་རྡོ་རྗེ་རྣམ་པར་འཇོམས་ལ་ཕྱག་འཚལ་ལོ། །ད་ནི་འཁོར་ལོའི་སྲུང་ཐབས་བསྟན༔ གསེར་གྱི་རྡོ་རྗེ་རྒྱ་གྲམ་དབུས༔ ལྟེ་བར་ཉི་ཟླའི་དཀྱིལ་འཁོར་སྟེང་༔ དེ་དབུས་ས་བོན་ཧྲཱིཿཡིག་མཐིང་༔ ཐ་མར་སྔགས་ཀྱིས་གཡས་སུ་བསྐོར༔ ཨོཾ་གུ་རུ་བཻ་ཌཱུཪྻ་ས་མུངྒ་ཏེ་སྭཱ་ཧཱ༔ སྲུངས་ཤིག་རཀྵ་རཀྵ་ཡེ་སྭཱ་ཧཱ༔ ཡང་རྫས་ཁྱུང་ལྔ་རྡོ་རྗེ་གསུམ༔ ་ཀླུ་འདུལ་གཟའ་བདུད་བོང་དཀར། བཟང་དྲུག་གུརྒུམ་ག་པུར་གསུམ༔ གླ་རྩི་ཤིང་ཀུན་བ་བླ་ཡང་ཟེར།བྱུག་པར་བྱ༔ རབ་གནས་ཡེ་དྷརྨཱས་བྱས་ལ༔ མི་ལག་མི་བརྒྱུད་མགུལ་དུ་བཏགས༔ གནམ་ལྕགས་རྡོ་རྗེའི་གོ་ཁྲབ་འདྲ༔ འགོས་ནད་ཀུན་གྱིས་ཉམ་མི་ང་༔ སྲུང་འཁོར་གྱི་ལེའུ་སྟེ་བཞི་བཅུ་པའོ༔
༄། །རྫས་བསྲུང་ལེའུ་ཞེ་གཅིག་པ།
༁ྃ༔ 
46-15-15a
བཛྲ་ཀྲོ་དྷ་རཱ་ཛ་ཡ༔ ་རྡོ་རྗེ་ཁྲོ་བོའི་རྒྱལ་པོ། གསུམ་པ་རྫས་ཀྱི་བསྲུང་བ་ནི༔ གུ་གུལ་གླ་རྩི་གུར་གུམ་གསུམ༔ ཤིང་ཀུན་ཛཱ་ཏི་ལི་ཤི་དང་༔ སྒོག་པ་རྣམས་ནི་སྣ་རུ་བསྣོམ༔ སྟག་ཤ་བ་བླ་ཤུ་དག་དང་༔ འཛིན་པ་གླ་རྩི་སྤྲུ་ནག་དང་༔ མུ་ཟི་རྣམས་ནི་ལུས་ལ་བྱུགས༔ ཁྱུང་ལྔ་བཟང་དྲུག་ལུས་ལ་བཏགས༔ འགོས་པའི་ནད་རིགས་ཐམས་ཅད་ཐུབ༔ རྫས་བསྲུང་ལེའུ་ཞེ་གཅིག་པའོ༔
༄། །རྫོགས་ཆེན་བསྒོམ་པའི་ལེའུ་སྟེ་ཞེ་གཉིས་པ།
༁ྃ༔ པདྨ་བཛྲ་ལ་ན་མོ༔ ་པདྨ་རྡོ་རྗེ་ལ་ན་མོ། སྨན་པ་སངས་རྒྱས་ཐོབ་པའི་མན་ངག་འདི༔ རང་སེམས་མི་དྲན་དགུ་དྲན་ལ༔ མ་ཡེངས་ངང་ནས་རང་སེམས་གཅེར་གྱིས་ལྟ༔ གང་ཤར་ཆོས་སྐུའི་ངོ་བོ་སྟེ༔ བཟོ་བཅོས་མེད་པའི་ངང་ལ་བཞག༔ གསལ་སྒྲིབ་བྱུང་ན་རང་ཞལ་ལྟ༔ བདེ་སྡུག་བྱུང་ན་ཉམས་སུ་མྱོང་༔ དུས་རྒྱུན་མ་ཡེངས་ཏུ་རེ་བསྐྱང་༔ སྨྲ་བརྗོད་བྲལ་བའི་སངས་རྒྱས་འདི༔ རྙེད་ན་དངོས་གྲུབ་མཐའ་རུ་ཕྱིན༔ སངས་རྒྱས་ཡིན་པར་ཐེ་ཚོམ་མེད༔ རྫོགས་ཆེན་བསྒོམ་པའི་ལེའུ་སྟེ་ཞེ་གཉིས་པའོ༔
༄། །འཇའ་ལུས་མཁའ་སྤྱོད་འགྲུབ་པའི་ལེའུ་སྟེ་ཞེ་གསུམ་པ།
༁ྃ༔ གུ་རུ་པདྨ་ལ་ན་མོ༔ ་བླ་མ་པདྨ་འབྱུང་གནས་ལ་ན་མོ། རིག་འཛིན་སྒྲུབ་པའི་གདམས་ངག་འདི༔ རང་ལུས་ཐ་མལ་སྤྱི་གཙུག་ཏུ༔ སངས་རྒྱས་སྨན་བླ་སྐུ་མདོག་མཐིང་༔ བཻ་ཌཱུཪྻ་
46-15-15b
ཡི་འོད་ཟེར་ཅན༔ སངས་རྒྱས་ཐམས་ཅད་འདུས་པའི་ཐུགས༔ འཇའ་ལུས་མཁའ་སྤྱོད་ཚུལ་དུ་བསྒོམ༔ གསོལ་བ་བཏབ་པས་འོད་དུ་ཞུ༔ ཡི་གེ་ཧྲཱིཿཡིག་མཐིང་གར་གྱུར༔ སྤྱི་བོའི་གཙུག་ནས་རང་ལ་ཐིམ༔ རང་ཉིད་སངས་རྒྱས་སྨན་བླ་གསལ༔ དེ་རྗེས་རང་སེམས་གཅེར་གྱིས་ལྟ༔ བལྟས་པས་རང་སེམས་སངས་རྒྱས་གསལ༔ འཇའ་ལུས་མཁའ་སྤྱོད་འགྲུབ་པའི་ལེའུ་སྟེ་ཞེ་གསུམ་པའོ༔
༄། །བདུད་རྩི་སྨན་སྒྲུབ་ཀྱི་ལེའུ་སྟེ་ཞེ་བཞི་པ།
༁ྃ༔ བླ་མའི་བདུད་རྩི་སྨན་སྒྲུབ་ཀྱི་ལེའུ་ཞེས་བྱ་བ༔ རང་ཉིད་སངས་རྒྱས་སྨན་བླ་བསྒོམ༔ མདུན་དུ་རྣམ་རྒྱལ་བུམ་པ་བཞག༔ མ་ཡེངས་ངང་ནས་ཛཔ྄་འདི་བཟླས༔ ཨོཾ་བྷེ་ཥ་ཛྱེ་གུ་རུ་བཻ་ཌཱུཪྻ་རཱ་ཛ་ས་མུཏྒ་ཏེ་སྭཱ་ཧཱ༔ སྨན་སྒྲུབ་རྫས་ལ༔ ག་པུར་གི་ཧང་ཙནྡན་དཀར་དམར་གཉིས༔ བཟང་དྲུག་གླ་རྩི་འབྲས་བུ་གསུམ༔ རྒུན་འབྲུམ་ཤིང་མངར་པི་པི་ལིང་༔ དབང་པོ་ལག་པ་ར་མཉེ་བ༔ ཀ་ར་བུ་རམ་སྦྲང་རྩི་སྦྱར༔ བུམ་ནང་བླུགས་ལ་ཐུན་རྒྱུན་བྱའོ༔ འབུམ་འབུམ་བཟླས་པས་རིལ་བུ་འཕུར༔ གྲུབ་ཐོབ་ཚེ་ཡི་རིག་འཛིན་ཐོབ༔ ཁ་ལ་བྱིན་ན་ཉེས་ལྟུང་དང་༔ སྡིག་སྒྲིབ་མ་ལུས་བྱང་བར་འགྱུར༔ བར་ཆད་རྐྱེན་དང་ནད་རིམས་ཟློག༔ རིག་འཛིན་ཚེ་ཡི་དངོས་གྲུབ་ཐོབ༔ བདུད་རྩི་སྨན་སྒྲུབ་ཀྱི་ལེའུ་སྟེ་ཞེ་བཞི་པའོ༔ 
46-15-16a
ས་མ་ཡ༔ རྒྱ་རྒྱ་རྒྱ༔ ཨྠྀི་༔
༄། །བླ་མའི་སྨན་གྱི་ལེའུ་སྟེ་ཞེ་ལྔ་པ།
མ་ཧཱ་གུ་རུ་ལ་ན་མོ༔ ་བླ་མ་ཆེན་པོ་ལ་ན་མོ། ཀླུ་དང་ས་བདག་གནོད་པ་ཡིས༔ བད་ཀན་མགུལ་འགགས་མིད་གཅུས་འབྱུང་༔ ་གྲེ་འབྱར་ཟེར། རྩ་ཆུ་བརྟག་མེད་འགྱུར་ལྡོག་བྱེད༔ ཁ་ལུད་དཀར་སྔོ་ནག་པོ་འབྱུང་༔ བླ་མ་རིག་འཛིན་བདུད་རྩི་བསྟན༔ ཅོང་ཞི་སྤང་རྒྱན་རིགས་གསུམ་དང་༔ གི་ཧང་ཅུ་གང་ཙནྡན་དཀར་དམར་གཉིས༔ ལི་ཤི་རུ་རྟ་མ་ནུ་དང་༔ འུ་སུ་ཨ་རུ་གོ་བོའི་གྲེ་བ༔ ཀ་ར་བུ་རམ་སྦྱར་བ་ཡིས༔ བད་ཀན་འགུལ་འགགས་མིད་གཅུས་སེལ༔ བླ་མ་རིག་འཛིན་བདུད་རྩི་འོ༔ སྔགས་ནི་འདི་ཉིད་ཤིན་ཏུ་ཟབ༔ ནཱ་ག་ཤི་རི་ཕུ་སོད༔ ཅོང་ཞི་ཆུ་ལ་བཙོས་ལ་སྔགས༔ ཨྠྀི་༔ དེ་རྗེས་ལྕེ་རྩ་གཏར་བས་སེལ༔ ཕྱག་རྡོར་ཁྱུང་ཁྲའི་རྗེས་གནང་ཞུ༔ ཀླུ་འབུམ་ཀླུ་མཆོད་ཀླུ་གཏོར་བྱེད༔ སྙིང་པོ་བཛྲ་གུ་རུ་བཟླ༔ བླ་མའི་སྨན་གྱི་ལེའུ་སྟེ་ཞེ་ལྔ་པ་འོ༔
༄། །རྡོ་རྗེ་ཁྱུང་གི་ལེའུ་སྟེ་ཞེ་དྲུག་པ།
༁ྃ༔ ཛྙཱ་ན་གཱ་རུ་ཊ་ལ་ན་མོ༔ ་ཡེ་ཤེས་ཁྱུང་ལ་ཕྱག་འཚལ་ལོ། གདོལ་པ་འཁྲུགས་པས་མཛེ་ནད་འབྱུང་༔ སེམས་སྡུག་སྙིང་གཟེར་མཁྲིས་མཆིན་གཟེར༔ ཆུ་ནི་དམར་ནག་སྣ་ཚོགས་འཚུབས༔ རྩ་ནི་འདར་འཁྲིགས་འཚུབས་པའོ༔ ཚགས་ཀྱུ་རྒྱུག་ལ་ཟ་འཆའ་ལང་༔ ལྤགས་པ་ཐང་ཤིང་བཤུས་པ་འདྲ༔ བྱ་ཁྱུང་ནག་པོའི་སྦྱོར་བ་བསྟན༔ ཁྱུང་ལྔ་གུ་གུལ་མུ་མེན་
46-15-16b
དང་༔ གངས་འཛིན་བཟང་དྲུག་སེང་ལྡེང་ཞུན༔ དངུལ་ཆུ་ཀ་ར་སྦྱར་བ་ཡིས༔ ས་གདོན་ཀླུ་གདོན་ཆམ་ལ་འབེབ༔ སྔགས་ནི༔ ཨོཾ་བཛྲ་ཁྲོམ་ག་རུ་ཊ་ཙ་ལེ་ཙ་ལེ་ཧཱུྃ་ཕཊ༔ ནཱ་ག་ནག་པོའི་སྲོག་ལ་མཱ་ར་ཡ་ཕཊ༔ རྦད་རྦད་རཾ་རཾ༔ གླ་རྩི་གུ་གུལ་མུ་མེན་སྔགས་ལ་ཟ༔ ཁྱུང་སྡེ་ལྔ་འདོན༔ ཕྱག་ན་རྡོ་རྗེའི་སྙིང་པོ་བཟླ༔ དེ་ཡིས་སེལ་བར་ཐེ་ཚོམ་མེད༔ རྡོ་རྗེ་ཁྱུང་ནག་སྦྱོར་བའོ༔ རྡོ་རྗེ་ཁྱུང་གི་ལེའུ་སྟེ་ཞེ་དྲུག་པའོ༔
༄། །བླ་མ་བདུད་རྩི་ཆུ་རྒྱུན་གྱི་ལེའུ་སྟེ་ཞེ་བདུན་པ།
༁ྃ༔ གུ་རུ་བདུད་རྩི་འབྱུང་གནས་ལ་ན་མོ༔ བཤལ་སྐྱུགས་བདུད་རྩིའི་ཆུ་རྒྱུན་བསྟན༔ འདྲེན་ལ༔ རི་ཤོ་སྤྱང་ཚེར་པོ་སོ་འཆའ༔ དུར་བྱིད་ཆུ་དག་རྣམ་པ་ལྔ༔ རང་རང་གཉེན་པོ་བསྡེབས་པས་ནད་རིགས་འདྲེན༔ བཤལ་ལ་ཐར་ནུ་དུར་བྱིད་ཆུ་རྩ་དང་༔ རེ་ལྕག་དན་ད་རྣམ་པ་ལྔ༔ རང་རང་གཉེན་པོ་བསྡེབས་པས་ནད་ཀུན་སྦྱོང་༔ རྩ་སྦྱང་བྱང་བ་རྒྱ་ཚ་སྡིག་སྲིན་དང་༔ གསེར་བྱེ་ཆུ་སྦུར་རྣམ་པ་ལྔ༔ རང་རང་གཉེན་པོ་བསྡེབས་པས་རྩ་ནད་སྦྱོང་༔ ཐམས་ཅད་ཀྱི་སྔོན་འགྲོ་ལ༔ གཡེར་མ་གཟེ་མ་ལྕམ་པ་གསུམ་གྱི་ཐང་གཏང་༔ བདུད་རྩི་ཆུ་རྒྱུན་སྦྱོར་བའོ༔ བླ་མ་བདུད་རྩི་ཆུ་རྒྱུན་གྱི་ལེའུ་སྟེ་ཞེ་བདུན་པའོ༔
༄། །མགོ་བཅོས་ལེའུ་སྟེ་ཞེ་བརྒྱད་པ།
༁ྃ༔ སྨན་གྱི་བླ་ལ་ཕྱག་འཚལ་ལོ༔ མགོ་བཅོས་མན་ངག་བཤད་པར་བྱ༔ གྲི་དང་མདའ་དང་རྡོ་སོགས་
46-15-17a
བརྡབ༔ ཆག་དང་སྒྲིབ་དང་གས་པ་དང་༔ པགས་རྒྱ་རྩ་རྒྱ་ཤ་རྒྱ་དང་༔ རུས་རྒྱ་ཀླད་རྒྱ་ཉམས་པ་སོགས༔ སྐྱོན་མེད་ཆུ་སྔོ་དཀར་བ་དང་༔ སྐྱོན་ཅན་ཆུ་ནི་དམར་སེར་རླངས་པ་ཆེ༔ སྐྱུགས་དང་རྒྱལ་བ་ཆགས་པ་ཡིན༔ རྩ་ནི་རགས་གྲིམ་འདར་བར་འཕར༔ དེ་ཡི་བཅོས་ཐབས་མན་ངག་བཤད༔ འབྲས་བུ་གསུམ་དང་ཨ་ཝ་འབུ་སུ་ཧཾ༔ མ་ཐང་མཆིན་བུ་གྲེ་གུ་གསེར་ཐིག་སོགས༔ མགོ་ཚད་སེལ་ཅིང་ཆུ་སེར་སྐེམ་པར་བྱེད༔ ཨྠྀི་༔ དེ་རྗེས་ཕྱེ་མའི་སྦྱོར་བ་བསྟན་པ་ནི༔ གི་ཧང་ཅུ་གང་མ་གི་ཏ༔ དོམ་མཁྲིས་རྒྱ་མཚལ་ཨ་རུ་ར༔ འབྲི་རྟ་ས་འཛིན་ཨ་ཝ་འབུ་སུ་ཧཾ༔ མ་ཐང་མཆིན་བུ་སྟབ་སེང་དང་༔ སྲོལ་གང་ཟེར།་སྲོ་ལོ་གངས་ཐིག་ཨ་བྱག་རྡོ་རྒྱལ་བཞི༔ གྲུ་བཞི་ཀ་ར་བུ་རམ་སྦྲང་རྩི་སྦྱར༔ མགོ་ཆག་ཀླད་རལ་རྩ་ཆད་མཐུད༔ མགོ་བོའི་ཆག་སྐྱོན་ཐམས་ཅད་སེལ་བའི་མཆོག༔ བདུད་རྩི་ཉིད་དང་མཚུངས་པའོ༔ མགོ་བཅོས་མན་ངག་སྙིང་ཐིག་ཡིན༔ མགོ་བཅོས་ལེའུ་སྟེ་ཞེ་བརྒྱད་པའོ༔
༄། །ཚ་གྲང་བརྟག་ཐབས་ཉི་ཟླའི་སྒྲོན་མའི་ལེའུ་སྟེ་ཞེ་དགུ་པ།
༁ྃ༔ མ་ཧཱ་གུ་རུ་ལ་ན་མོ༔ ་བླ་མ་ཆེན་པོ་ལ་ཕྱག་འཚལ་ལོ། །ནད་རིགས་ཀུན་གྱི་བརྟག་ཐབས་བསྟན༔ སྦ་ལ་ཉི་མའི་སྒྲོན་མ་བྲི༔ བདེ་བའི་སྟན་ལ་འགོད་ནས་ནི༔ སྐད་ཅིག་ཡེངས་མེད་དྲན་རིག་བརྟན༔ མ་ཡེངས་
46-15-17b
རྩེ་གཅིག་ངང་དུ་ནི༔ བློ་སེམས་སྒྲིམ་སྟེ་བརྟག་པར་བྱ༔ ནད་རྣམས་ཐམས་ཅད་ཚ་གྲང་གཉིས་སུ་འདུས༔ ཚ་ཞིང་ན་ལ་གཟེར་བ་དང་༔ ཆུ་མདོག་དམར་སེར་རླངས་པ་ཆེ༔ རྩ་ནི་ཕྲ་གྲིམ་མགྱོགས་པར་འཕར༔ དེ་ནི་ནད་རིགས་ཚ་བའི་རྟགས༔ གྲང་ཞིང་འཁྱགས་ལ་ན་བ་དང་༔ ཆུ་མདོག་དཀར་སྔོ་རླངས་པ་ཆུང་༔ རྩ་ནི་ཞན་བྱིང་ཕྲ་གུད་དལ༔ དེ་ནི་ནད་རིགས་གྲང་བ་ཡིན༔ ཚ་གྲང་མ་ནོར་སོ་སོར་རྟོགས༔ རང་རང་གཉེན་པོ་བརྟེན་པར་གཅེས༔ ཚ་གྲང་བརྟག་ཐབས་ཉི་ཟླའི་སྒྲོན་མའོ༔ ཚ་གྲང་བརྟག་ཐབས་ཉི་ཟླའི་སྒྲོན་མའི་ལེའུ་སྟེ་ཞེ་དགུ་པའོ༔
༄། །ཚ་གྲང་འཁྲུག་གསུམ་བཅོས་པའི་བདུད་རྩི་ཐབས་ཤེས་ཉི་ཟླའི་སྦྱོར་བའི་ལེའུ་སྟེ་ལྔ་བཅུ་པ།
༁ྃ༔ དྲང་སྲོང་རིག་འཛིན་རྣམས་ལ་ཕྱག་འཚལ་ལོ༔ ད་ནི་ཚ་བའི་ནད་ཀྱི་བཅོས་ཐབས་བསྟན༔ ཚད་པའི་ནད་ལ་བསིལ་སྨན་ཏེ༔ གྲང་བའི་ནད་ལ་དྲོད་སྨན་བརྟེན༔ ཚ་གྲང་འཐབས་ན་བསིལ་དྲོད་སྙོམས་པའོ༔ འདུ་བ་འཁྲུགས་ན་གང་མཐོ་མནན༔ ཚད་ནད་ཐམས་ཅད་མེ་ཡི་ཁམས༔ གྲང་ནད་ཐམས་ཅད་ཆུ་ཡི་ཁམས༔ འདུ་བ་འཁྲུགས་པ་མེ་ཆུ་འཐབས༔ ག་པུར་གི་ཧང་ཙནྡན་དང་༔ གུ་གུལ་གླ་རྩི་རྣམ་པ་ལྔ༔ ཚ་བ་སེལ་བའི་སྨན་སྡེ་ཡིན༔ སེ་འབྲུ་ད་ལི་ཕོ་བ་རིས༔ པི་ལིང་སྒ་དམར་རྣམ་པ་ལྔ༔ གྲང་བ་སེལ་བའི་སྨན་སྡེ་ཡིན༔ འབྲས་བུ་གསུམ་གྱིས་འདུ་བ་
46-15-18a
ཆ་སྙོམས་སེལ༔ ནད་དང་སྨན་གཉིས་དེ་ལྟར་སྤྲད༔ དེ་ལྟར་བྱས་པས་མ་སེལ་ན༔ ཚེ་ཚད་ཡིན་པས་ཚོགས་གསག་བསྐུལ༔ ཚ་གྲང་འཁྲུག་གསུམ་བཅོས་པའོ༔ ཚ་གྲང་འཁྲུག་གསུམ་བཅོས་པའི་བདུད་རྩི་ཐབས་ཤེས་ཉི་ཟླའི་སྦྱོར་བའི་ལེའུ་སྟེ་ལྔ་བཅུ་པའོ༔
༄། །ནག་པོ་ཆེན་པོའི་སྨན་སྦྱོར་གྱི་ལེའུ་སྟེ་ང་གཅིག་པ།
༁ྃ༔ ཤྲཱི་མ་ཧཱ་ཀཱ་ལ་ལ་ན་མོ༔ ་དཔལ་མགོན་ཆེན་པོ་ལ་ཕྱག་འཚལ་ལོ། །སྨན་དང་སྔགས་གཉིས་གསེར་སྲང་རེའི་བཀའ་རྒྱ་ཡོད། སློབ་དཔོན་པདྨས་གསུངས། ཁྱི་དུག་འདྲེ་ནད་བཅོས་པའི་ཐབས༔ ཁྱི་སྨྱོན་གྱིས་རྨུགས་པའི་ཞག་གཅིག་ནས༔ འབྲས་བུ་གསུམ་གྱི་བསྡུས་ཐང་གཏང་༔ ཁྱུང་ལྔ་སྟོང་ཟིལ་ཁྱི་ལྕེ་དང་༔ ཁྱི་དུག་ཕྱེ་མ་ཁོང་དུ་གཏང་༔ ཁྱི་དུག་གིས་ཟིན་འདྲེ་ནད་སེལ༔ དེ་རྗེས་ཟ་ཡིག་འདི་ལྟར་ཟ༔ ཨོཾ་ཧབ་ཧྲིལ༔ སྔ་དྲོ་ཟ༔ ཧྲིལ་ཧབ་ཨོཾ༔ ཕྱི་དྲོ་ཟ༔ རྒྱ་སྣག་གིས་བྲི༔ ཡེ་དྷརྨཱས་རབ་གནས་བྱེད༔ སྙིང་པོ་བཛྲ་གུ་རུ་བཟླ༔ སྲུང་བ་རྡོ་རྗེ་རྣམ་འཇོམས་འདོན༔ འཐབ་མོ་ཡུགས་སའི་གྲིབ་ལ་འཛེམ༔ སྤྱང་ཐོད་དགུ་དང་འོ་དོད་འབོད༔ རྟ་རྒྱུག་ཆུ་བཀལ་འགྲོ་འདུག་སྤང་༔ ཚེ་དབང་ཞུ་ལ་ཚེ་ཆོག་འདོན༔ སྨན་དང་ཟ་ཡིག་ཟླ་གསུམ་བརྟེན༔ དེ་ལྟར་བྱས་པས་སེལ་བར་ཐེ་ཚོམ་མེད༔ ཡང་ན་སྔགས་ནི་འདི་ལྟར་བྱ༔ རང་ཉིད་ཨ་ཙ་ར་བསྒོམ༔ 
46-15-18b
ཨོཾ་ཨག་སོད༔ ཨིག་སོད༔ གུ་གུ་རཱ་ཙ་སོད༔ མེ་དབལ་སོད༔ ཆུ་དབལ་སོད༔ རླུང་ཐོག་སོད༔ ཉི་མའི་ཟེར་སོད༔ ཟླ་བའི་འོད་སོད༔ སྐར་མའི་མདངས་སོད༔ ཞི་ཞི་སྭཱ་ཧཱ༔ ནམ་མཁའ་སྤང་བའི་ཆུ་གཙང་ལ༔ བཟླས་པས་འཐུང་ན་ཁྱི་དུག་གི༔ སྡུག་བསྔལ་སེལ་བར་ཐེ་ཚོམ་མེད༔ ཡང་གཅིག་ལ༔ སྨྱོ་བར་གྱུར་ན་སྔགས་འདི་བཟླ༔ ཨོཾ་མེ་བུ་རཾ༔ ཆུ་བུ་རཾ༔ རཾ་རཾ་པ་ཡེ་སྭཱ་ཧཱ༔ ལྕེ་ཡར་མ་ཡར་མ་སོད༔ དྷིར་མ་དྷིར་མ་སོད༔ རྒྱ་ཆུར་ཆར་བུར་ཟུང་ཞིག༔ ཡང་གཅིག་ལ༔ ཨོཾ་གི་ཨཱ་ནན༔ མུ་ལ་ཀུ་ཤ༔ བྲག་དམར་རྐུ་གཅིག༔ མོ་ལམ་ནན༔ བྷམ་མ་དྷེ་བ་བི་ཙུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ༔ ཞེས་ནད་ཚབས་ཆེ་བར་གྱུར་ན་ཁྲི་ཚོ་གཅིག༔ འབྲིང་ན་སྟོང་ཚོ་གཅིག༔ ཆུང་ན་བརྒྱ་རྩ་གཅིག་སྔགས་སོ༔ ཐེ་ཚོམ་མེད༔ མ་ཧཱ་ཀཱ་ལའི་བདུད་རྩི་འོ༔ ནག་པོ་ཆེན་པོའི་སྨན་སྦྱོར་གྱི་ལེའུ་སྟེ་ང་གཅིག་པའོ༔
༄། །ལུང་བསྟན་གྱི་ལེའུ་སྟེ་ང་གཉིས་པ།
༁ྃ༔ གུ་རུ་མཚོ་སྐྱེས་རྡོ་རྗེ་ལ་ན་མོ༔ སྙིགས་མ་ལྔ་ཡི་ཐ་མའི་དུས༔ པད་འབྱུང་ཕོ་ཉ་གཏེར་སྟོན་བདེ་ཆེན་གླིང་༔ འདམ་སྐྱེས་པདྨ་ལྟ་བུར་འབྱུང་བར་འགྱུར༔ དེ་འདྲའི་ཉེ་དུ་ཐམས་ཅད་དགྲ་རུ་ལང་༔ ཡོན་ཏན་མཁན་གྱིས་ཆགས་སྡང་གསོག༔ བདུད་རིགས་འགའ་རེས་ལོག་ལྟ་བྱེད༔ དེ་དུས་སྐལ་ལྡན་འགའ་ཡང་
46-15-19a
འབྱུང་༔ ལས་འཕྲོ་ཅན་གྱིས་ཆོས་ལ་སྤྱོད༔ དམ་ཚིག་ཅན་ལ་དག་སྣང་འཆར༔ བསོད་ནམས་ཅན་ལ་དངོས་གྲུབ་སྟེར༔ སྐལ་མེད་མང་པོ་ཆོས་སྐལ་ཆད༔ དམ་ཚིག་ཆག་ན་དམྱལ་བར་འགྲོ༔ སྐལ་ལྡན་འགའ་ལ་དག་སྣང་འཆར༔ གསང་སྔགས་ཐེག་ཆེན་ཆོས་ལ་སྤྱོད༔ མཆོག་གི་དངོས་གྲུབ་རྡོ་རྗེའི་ཐེག་པ་སྒྲུབ༔ དེ་འདྲ་པད་འབྱུང་རྗེས་སུ་འབྲང་༔ མ་འོངས་ལུང་དུ་བསྟན་པ་ཡིན༔ ལུང་བསྟན་གྱི་ལེའུ་སྟེ་ང་གཉིས་པའོ༔
༄། །སྐྱེས་རབས་ལུང་དུ་བསྟན་པའི་ལེའུ་སྟེ་ང་གསུམ་པ།
༁ྃ༔ གུ་རུ་བཻ་ཌཱུཪྻ་ལ་ན་མོ༔ རིག་འཛིན་པདྨའི་ཐུགས་ཀྱི་སྲས༔ ལྷོ་ནུབ་མཚམས་ནས་བདེ་ཆེན་གླིང་པ་འབྱུང་༔ ཁ་རག་ཕྱོགས་ནས་པདྨའི་སྙིང་ཐིག་འདོན༔ སྦས་པའི་ཚུལ་གྱིས་ཆོས་ཀྱི་གཏེར་ཁ་འདོན༔ གབ་པའི་ཚུལ་གྱིས་སྐལ་ལྡན་ཆོས་ལ་འགོད༔ གསང་བའི་ངང་ནས་འགྲོ་དྲུག་བདེ་ལ་འགོད༔ མུན་པའི་གླིང་དུ་ཉི་མ་ཤར་བ་བཞིན༔ འགྲོ་དྲུག་སེམས་ཅན་རྣམས་ཀྱི་སྡུག་བསྔལ་སེལ༔ དེ་དུས་ཆོས་བདག་གྲུབ་ཐོབ་འགའ་ཡང་འབྱུང་༔ ཆོས་སྐུ་རྡོ་རྗེ་འཆང་གི་ཐུགས་རྒྱུད་ནས༔ གཞོན་ནུ་གུ་རུ་བདེ་མཆོག་ཅེས་བྱ་དང་༔ བནྡྷེ་ཤྲཱི་ཝཱ་ན་ཛྙཱ་ན་དང་༔ གྲ་ཚགས་གུ་རུ་མངྒ་ལཾ༔ ཆོས་བདག་མ་ནོར་རིགས་ཀྱི་བུ༔ སྐྱེས་རབས་ལུང་དུ་བསྟན་པའི་ལེའུ་སྟེ་ང་གསུམ་པའོ༔
༄། །མ་འོངས་པ་ལུང་དུ་བསྟན་པའི་ལེའུ་སྟེ་ང་བཞི་པ།
༁ྃ༔ གུ་རུ་
46-15-19b
པདྨ་འབྱུང་གནས་ལ་ན་མོ༔ གུ་རུ་པདྨས་ཡེ་ཤེས་མཚོ་རྒྱལ་ལ་བཀའ་བསྩལ་པ༔ ཨེ་མ་ཧོ༔ དུས་ངན་བཞི་བཅུ་ཁ་རལ་དུས༔ རབ་བྱུང་མང་པོས་བཙུན་མ་སྤྱད༔ དེ་ནི་པད་འབྱུང་ཆ་ལུགས་ཟེར༔ ང་ཡི་གཏེར་སྟོན་ཡིན་ནོ་སྨྲ༔ ཤཱཀྱ་ཐུབ་པའི་བསྟན་པ་བཤིག༔ དེ་དུས་མ་མོ་མཁའ་འགྲོ་འཁྲུགས༔ ནམ་མཁར་ལྷོ་བུར་དམར་པོ་འཁྲིགས༔ གཟའ་གཟེར་རྡེག་འཆོམས་ཐོག་སེར་འབེབ༔ ལན་རེ་ཉི་མའི་བསྐལ་པ་དར༔ ཤི་འདྲེ་གསོན་འདྲེ་དམ་སྲི་དར༔ མི་ནད་ཕྱུགས་ནད་རླུང་ལྟར་འཚུབས༔ ་ས་འགོའི་ནད་དང་གླང་ཐབས་ལ་སོགས་པ། གློ་ཧོན་ས་གཟེར་ལ་སོགས་འབྱུང་བའོ། །གག་ལྷོག་གཟེར་གསུམ་བདུན་དྲུག་གིས༔ ཕོ་མོ་མང་པོ་ཧུར་ཐུམས་འཆི༔ བཙའ་སད་སེར་གསུམ་མུ་གེ་འབྱུང་༔ དེ་དུས་སྐྱེ་འགྲོ་སྙིང་རེ་རྗེ༔ ཀྱེ་མ་ཀྱི་ཧུད་ཨ་ཙ་མ༔ དེ་དུས་པད་འབྱུང་ཐུགས་རྗེ་མྱུར༔ མ་འོངས་པ་ལུང་དུ་བསྟན་པའི་ལེའུ་སྟེ་ང་བཞི་པའོ༔
༄། །ཞལ་ཆེམས་ཀྱི་ལེའུ་སྟེ་ང་ལྔ་པ།
༁ྃ༔ པདྨ་ཐོད་ཕྲེང་རྩལ་ལ་ན་མོ༔ ཆོས་ལུགས་མདོ་སྔགས་གཉིས་སུ་གྱིས༔ ་བཀའ་མ་དང་གཏེར་མ་གཉིས་སུ་གྱིས། སྙིང་པོ་བཛྲ་གུ་རུ་ཟློས༔ གསོལ་འདེབས་ལེའུ་བདུན་མ་ཀློགས༔ ་རིག་འཛིན་རྒོད་ལྡེམ་གཏེར་མ། རིམ་གྲོ་པདྨ་བཀའ་ཐང་གྱིས༔ ་ཨོ་རྒྱན་གླིང་པའི་གསུང་དུ་འདུག་པ་འོ། །ཡི་དམ་གུ་རུ་ཞི་དྲག་
46-15-20a
བསྟེན༔ ་དཀོན་མཆོག་སྤྱི་འདུས། བླ་མ་ཚུལ་ཁྲིམས་རྣམ་དག་བསྟེན༔ ་སྡོམ་པ་དམ་ཚིག་གཙང་མ། ཉམས་ལེན་རང་རིག་ཆོས་སྐུ་སྐྱོངས༔ ་རང་སེམས་ལ་བལྟ། འཆི་ཆོས་དམ་པ་རིགས་བརྒྱ་གྱིས༔ ་ཀརྨ་གླིང་པ། རྐྱེན་ཟློག་སྒྲུབ་པ་བཀའ་བརྒྱད་གྱིས༔ ་གུ་རུ་ཆོས་དབང་ལུགས། སྲུང་འཁོར་མཚོན་ཆའི་འཁོར་ལོ་གྱིས༔ གུ་རུ་པདྨ་འབྱུང་གནས་ལ༔ སྙིང་གི་དཀྱིལ་ནས་གསོལ་བ་ཐོབས༔ ་དད་གུས་རྩེ་གཅིག་གིས་གསོལ་འདེབས། དེ་རྗེས་རང་སེམས་གཅེར་གྱིས་ལྟོས༔ ་ཆོས་སྐུ་སྟོང་ཉིད་ལྟོས། དགེ་བ་སྒྲུབས་ལ་སྡིག་པ་སྤོངས༔ ་དགེ་བ་གང་འཕེལ་དང་སྡིག་པ་འཛེམ་པ་གལ་ཆེའོ། །དུས་རྒྱུན་བླ་མའི་རྣལ་འབྱོར་སྐྱོངས༔ ་ཞི་ཁྲོའི་ལམ་ཟབ་སོགས་ལ་འབད། ཞལ་ཆེམས་ཀྱི་ལེའུ་སྟེ་ང་ལྔ་པའོ༔ ༁ྃ༔ ཨེ་མ་ཧོ༔ སློབ་དཔོན་པདྨ་འབྱུང་གནས་ཀྱིས༔ ཡེ་ཤེས་མཁའ་འགྲོ་མཚོ་རྒྱལ་མ་ལ་བཀའ་བསྩལ་པ༔ གསོ་རིག་བདུད་རྩི་བུམ་པ་འདི་ནི༔ བཀའ་གཏེར་གྱི་གསོ་རིག་ཐམས་ཅད་ཀྱི་སྙིང་ཐིག༔ སློབ་དཔོན་པདྨ་འབྱུང་གནས་ཀྱི་མན་ངག༔ འདི་ཉིད་ཁ་རག་གི་ལྷོ་ཕྱོགས་སུ་གཏེར་དུ་སྦོས༔ ལྔ་བརྒྱ་དུས་ཀྱི་ཐ་མ་ལ༔ ཚེ་ལོ་བཞི་བཅུ་ཁ་རལ་དུས༔ ལྷོ་ནུབ་མཚམས་ནས་འོངས་བའི་བུ༔ བདེ་ཆེན་གླིང་པ་དེ་ལ་གཏོད༔ འགྲོ་དོན་འབྱུང་བར་སྨོན་ལམ་བཏབ༔ བཀའ་སྲུང་དྲེགས་པ་སྡེ་དགུས་གྱིས༔ ཐུབ་པར་གྱིས་ཤིག་དྲེགས་
46-15-20b
པའི་ཚོགས༔ ཞེས་གསུངས་ཡེ་ཤེས་མཁའ་འགྲོ་ལ་གཏད༔ ཡེ་ཤེས་མཁའ་འགྲོ་མཚོ་རྒྱལ་གྱིས༔ བོད་ཤོག་ངོས་ལ་བོད་སྣག་གིས༔ དབུ་སྐྲས་མགྱོགས་པར་བྲིས་ནས་ནི༔ གུ་རུ་པདྨ་འབྱུང་གནས་བོད་ཟལ་མོ་སྒང་ལ་བྱོན་དུས༔ ཁ་རག་ཕྱོགས་སུ་གཏེར་དུ་སྦས་ནས་འགྲོ་དོན་འབྱུང་བར་སྨོན་ལམ་བཏབ་བོ༔ པདྨའི་ཐུགས་སྤྲུལ་ཨོ་རྒྱན་བདེ་ཆེན་གླིང་པས་བོད་ཤོག་གི༔ ཤོས་སེར་དཀྱུས་མཐོ་གང་ཡོད་པ་དེའི་ངོས་ནས་ཞལ་བཤུས་པའོ༔ འདི་ཡི་འགྲོ་དོན་བསྟན་པ་མཐའ་རྒྱས་ཤོག༔ ས་མ་ཡ༔ རྒྱ་རྒྱ་རྒྱ༔ ཨྠྀི་༔ བདེ་ཆེན་གླིང་པས་ཁ་རག་ཕྱོགས་ནས་གདན་དྲངས་པ་འོ།། ཅད། དཧྱ༔། མངྒ་ལཾ།། །།

